У Берасцейскай вобласці збіраюцца вакцынаваць дзяцей да 12 гадоў

• 13.01.2022, 20:43

Кажуць, заяўку на Pfizer ужо падалі.

У Берасцейскай вобласці плануюць прывіваць ад каранавіруса дзяцей да 12 гадоў. Вакцынаваць будуць Pfizer. Пра гэта парталу «Медиа-Полесье» паведамілі ў Берасцейскім абласным цэнтры гігіены, эпідэміялогіі і грамадскага здароўя.

У выданне звярнулася жыхарка Пінскага раёна, якая распавяла, што яе 10-гадовы сын-пяцікласнік прынёс паперу - згоду на вакцынацыю ад каранавіруса са словамі «Трэба запоўніць».

У Берасцейскім абласным цэнтры гігіены, эпідэміялогіі і грамадскага здароўя растлумачылі, што плануецца вакцынацыя дзяцей да 12 гадоў вакцынай Pfizer - заяўка на вакцыну ўжо пададзеная.

Нагадаем, 27 снежня ў Беларусі пачалі прышчэпліваць супраць COVID-19 дзяцей ва ўзросце 12-17 гадоў. Для гэтага бацькам або законным прадстаўнікам неабходна падпісаць згоду на вакцынацыю. Цяпер для вакцынавання прапануецца інактывіраваная кітайская вакцына Verо Cell.

Раней была інфармацыя, што ў 2022 годзе могуць пачаць вакцынаваць дзяцей Pfizer.

Так у інстаграм-старонцы дзіцячай кансультацыі Брагіна ў снежні мінулага года з'явілася апытанне: ці гатовы бацькі прышчапляць сваіх дзяцей з 5 гадоў прэпаратам «Pfizer (Еўропа)».

Як распавялі тады ў паліклініцы, на той момант яны збіралі інфармацыю аб тым, ці ёсць неабходнасць у прышчэпках і складалі спісы ахвочых. Аднак, са слоў суразмоўцы, вакцынаваць Pfizer могуць пачаць у 2022-м годзе.

У пачатку гэтага года прышчэпку супраць COVID-19 унеслі ў пералік прафілактычных прышчэпак па эпідэмічных паказаннях для дзяцей ва ўзросце ад 12 да 17 гадоў уключна. Вакцынацыю дарослых увялі ў гэты пералік яшчэ летась у кастрычніку.