«Белыя халаты»: У Беларусі катастрофа з дзіцячым захворваннем

• 28.01.2022, 21:27

Паліклінікі не спраўляюцца.

Інтэрнаў любога профілю, акрамя стаматалагічнага, накіравалі на два месяцы на дапамогу дзіцячым паліклінікам з 26 студзеня, прыпыніўшы часова праходжанне імі інтэрнатуры ў лячэбных установах «дарослага» профілю, піша тэлеграм-канал «Белыя халаты».

Інтэрны будуць ажыццяўляць візіты дадому, удзельнічаць у кантактных брыгадах, якія выязджаюць да пацыентаў з COVID-19.

Прыцягненне на гэтую працу інтэрнаў не педыятрычнага профілю азначае тое, што сітуацыя з недахопам працоўных рук у педыятрыі сапраўды вельмі цяжкая.

У стацыянарах, у тым ліку і дарослых, адны за іншымі перапрафілююцца аддзяленні пад прыём дзяцей з каранавіруснай інфекцыяй. Нягледзячы на тое, што большая частка дзяцей хварэе дома, некаторым патрабуецца шпіталізацыя ў сувязі з цяжкім станам.

Сёння агучаная лічба новых хворых у 2221 чалавек нават прыблізна не адлюстроўвае рэальны лавінападобны прырост новых хворых COVID-19, большую частку з якіх складаюць дзеці.