Чым адрозніваюцца сімптомы каранавіруса ў людзей рознага ўзросту?

• 11.02.2022, 11:14

Гэта высветлілі навукоўцы з Каралеўскага каледжа Лондана.

У першыя дні пасля заражэння каранавірусам у маладых і паджылых людзей назіраюцца розныя сімптомы. Да такой высновы прыйшлі навукоўцы з Каралеўскага каледжа Лондана.

Яны высветлілі, што маладыя і паджылыя людзі па-рознаму пераносяць ковід. У людзей да 40 у першыя дні часцей назіраюцца боль у грудзях або жываце і дыхавіца, а пасля 40 - кашаль. Даследаванне апублікаванае ў часопісе The Lancet (пераклад - cursorinfo.co.il).

Медыкі адсочвалі сімптомы, якія з'яўляюцца ў інфікаваных у першыя тры дні пасля станоўчага тэсту. Высветлілася, што ў розных узроставых групах пераважаюць свае сімптомы. Для групы 16-39 гадоў найбольш частымі прыкметамі COVID-19 была страта нюху, а таксама боль у грудзях або жываце і дыхавіца.

Для хворых ва ўзросце 40-59 гадоў больш характэрным сімптомам стаў пастаянны кашаль, але боль у грудзях і страта нюху таксама сустракаліся.

У людзей старэйшых за 60 і асабліва 80 гадоў страта нюху - менш распаўсюджаны сімптом. Часцей за пажылых пацыентаў турбуюць болі ў цягліцах і грудзях, дыхавіца і дыярэя.

Навукоўцы таксама выявілі адрозненні ў сімптомах у мужчын і жанчын. Прадстаўнікі абодвух полаў скардзяцца на страту нюху і боль у грудзях ці жываце. Аднак у мужчын дыхавіца, заняпад сіл і дрыжыкі выяўляюцца часцей.