Заражэнне омікронам: лекары назвалі «сімптом нумар адзін»

• 11.02.2022, 12:55

Некаторыя праявы гэтай хваробы патрабуюць аператыўнага звароту да лекараў.

Доктар медыцыны Эрык Чыо-Пенья расказаў у інтэрв'ю, якія станы з'яўляюцца «чырвонымі сцягамі», якія сігналяць аб заражэнні омікронам. Са слоў лекара, штам омікрон мае пераважна тыя ж прыкметы і сімптомы, што і іншыя штамы, якія выклікаюць COVID-19, піша medikforum.ru.

У значнай ступені гэта грыпападобныя сімптомы - боль у горле, катар, ліхаманка, дрыжыкі, цягліцавыя болі, парушаны нюх.

«Некаторыя справаздачы паказваюць, што першы сімптом, характэрны для заражэння омікронам, - гэта катар: ён сустракаецца ў хвалю гэтага штаму часцей, чым у перыяды распаўсюджвання іншых варыянтаў», - паведаміў медык.

У той жа час, кажа лекар, паколькі новы штам імкнецца ў першую чаргу паражаць дыхальныя шляхі, прыкметай нумар адзін можна лічыць усё, што выяўляецца як інфекцыя верхніх дыхальных шляхоў - закладзенасць, змяненне пахаў, боль і ціск у каляносавых пазухах і ў ілбе, выдзяленні з носа.

«Калі ў вас з'явяцца якія-небудзь сімптомы інфекцыі верхніх дыхальных шляхоў, вам трэба разглядаць захворванне ковідам як адзін з найбольш верагодных дыягназаў», – падкрэсліў доктар медыцыны.

Таксама лекар Чыа-Пенья назваў сімптомы, якія могуць казаць, што інфекцыя ўскладнілася, і чалавек мае патрэбу ў медыцынскай дапамозе. Экспэрт рэкамендуе выклікаць хуткую дапамогу, калі напрыклад, з'яўляюцца боль у грудзях і дыхавіца пры фізічнай актыўнасці, ці цяжкасці пры хадзе праз празмерную дыхавіцу. Апроч гэтага, патэнцыйна небяспечнай прыкметай з'яўляецца ссіненне пальцаў, пазногцяў, вуснаў.

Лекар падкрэсліў, што найбольш эфектыўным сродкам барацьбы з омікранам з'яўляецца вакцынацыя і рэвакцынацыя. Спасылаючыся на звесткі CDC, ён паведаміў, што практычна ні ў каго з людзей, якія былі вакцынаваныя і рэвакцынаваныя, не развілася пры заражэнні цяжкая інфекцыя. Медык удакладніў: у чалавека, які атрымаў вакцыну і бустэр, рызыка захварэць сур'ёзна прыкладна ў 40 разоў ніжэйшая, чым у непрышчэпленага чалавека, і прыкладна ў 8 разоў ніжэйшая, чым у вакцынаванага чалавека без бустэрнай прышчэпкі.