Медыкі патлумачылі, чаму Жырыноўскі цяжка пераносіць каранавірус

• 15.02.2022, 15:25

Стан палітыка пракаментаваў акадэмік РАН.

Экс-галоўны дзяржаўны санітарны лекар РФ Генадзь Анішчанка ў гутарцы з kp.ru распавёў, чаму лідар ЛДПР Уладзімір Жырыноўскі цяжка пераносіць каранавірус.

Са слоў былога кіраўніка Расспажыўнагляду, палітык «зацягнуў са шпіталізацыяй» праз «асобасныя рысы характару».

«Ну, мабыць, усё ж гэта звязанае з самаацэнкай асобы, што гэтая хвароба ніяк не можа яго закрануць, тым больш - пры такім дбайным выкананні захадаў засцярогі, магчыма, нават залішнім выкарыстанні сродкаў спецыфічнай прафілактыкі», - патлумачыў Анішчанка.

Лекар падкрэсліў, што калі б Жырыноўскі адразу лёг у лякарню, то цяпер бы ён адчуваў сябе значна лепш і ніхто б нават не даведаўся аб ягонай шпіталізацыі і хваробе.

9 лютага стала вядома, што Жырыноўскага шпіталізавалі з каранавіруснай інфекцыяй. Розныя СМІ паведамлялі, што ён знаходзіцца ў цяжкім стане з двухбаковай пнеўманіяй. Ацэнкі паражэння лёгкіх палітыка вар'ююцца ад 30 да 75 адсоткаў.

Раней у Міністэрстве аховы здароўя заявілі, што стан шпіталізаванага з «омікронам» Жырыноўскага стабільны.