Лічбам ад Піневіча веры няма
- 3.02.2022, 19:54
«Белыя халаты» падлічылі, колькі беларусаў заражаюцца COVID-19 кожны дзень
Telegram-канал «Белыя халаты» прадставіў сваю каранавірусную зводку:
- Толькі за ўчорашні дзень у горадзе Лідзе было атрымана 320 станоўчых ПЛР на каранавірусную інфекцыю. У горадзе з крыху больш чым 103 тысячамі жыхароў за адзін дзень вызначана 9% усіх выпадкаў каранавіруснай інфекцыі, калі верыць лічбам Міністэрства аховы здароўя. Калі, зноў жа, груба экстрапаліраваць звесткі з Ліды на ўсю Беларусь, то атрымаем ізноў тыя самыя больш чым 28000 меркаваных захварэлых за дзень. Улічваючы тое, што гэтая лічба атрымліваецца намі ўжо ў трэцім, няхай і грубым, падліку, магчыма, дзённы прырост новых захварэлых у Беларусі будзе прыкладна на ўзроўні паміж 25 і 30 тысячамі чалавек.
Між тым, аналізы на ковід у Менску стала вельмі складана здаць з прычыны новаўвядзення ад Міністэрства аховы здароўя. Цяпер ПЛР-тэст можна зрабіць толькі ў выпадку цяжкай інфекцыі з падазрэннем на пнеўманію. Ці ўвойдуць выпадкі ВРВІ, не тэставаныя на ковід (але з'яўляюцца ковід) у ковідную статыстыку?
Іўеўская ЦРБ Гарадзенскай вобласці: з 02.02 тэстаў у пацыетаў ніякіх не бяруць наогул, ва ўсіх у лістках непрацаздольнасці паказваецца шыфр ВРВІ (j06), шпіталізацыя ў стацыянар - толькі ў выпадку пацверджанай пнеўманіі (тады ж зробяць і тэст). Вось, уласна кажучы, і адказ на пытанне з папярэдняга абзаца. Элегантны спосаб пазбегнуць наўпроставых і ўскосных статыстычных падлікаў па ковід - скасаваць тэставанне наогул.
Міністэрства аховы здароўя рэкамендавала не праводзіць вечарыны сустрэч выпускнікоў у сувязі з эпідэміялагічна неспрыяльнай сітуацыяй па ковід. Як ні дзіўна, экскурсіі ў музеі, школьныя і дашкольныя заняткі ў дзяцей, заняткі ва ўніверсітэтах і працу, якую можна перавесці дыстанцыйна, міністэрства як заўсёды праігнаравала. Роўна як і адкрытыя бары, рэстарацыі, канцэртныя пляцоўкі і іншыя культурна-забаўляльныя ўстановы. І скасаваны ў кастрычніку маскавы рэжым, вядома ж Міністэрства аховы здароўя таксама прадаўжае ігнараваць. Селектыўная актыўнасць дзеля імітацыі бурнай дзейнасці — гэта так па-міністэрску.
У адной з паліклінік Гарадзенскай вобласці на прыёме ў лекара-інфекцыяніста бывае бязмала 60 чалавек. З 20-35 ПЛР, узятых за дзень, адмоўнымі прыходзяць 2-3. Адносны паказчык станоўчых ПЛР ад усіх узятых дэманструе, як правіла, напружанасць хвалі пандэміі: чым бліжэй гэты паказчык да 100%, тым горшая сітуацыя з распаўсюджваннем віруса ў папуляцыі, бо практычна кожны ўзяты аналіз у пацыента з сімптомамі з'яўляецца станоўчым.
Зменены графікі работы паліклінік Беларусі, цяпер яны будуць працаваць і ў выхадныя дні. Прыём пацыентаў, роўна як і агляды дома будуць праводзіцца цяпер і ў суботу з нядзеляй.
Навіны пакуль такія.
Прадаўжаем намагаць на тым, каб вы, дарагія беларусы, прыклалі максімальныя намаганні, каб пазбегнуць хваробы. А менавіта - насілі маскі, старанна мылі рукі, выконвалі захады сацыяльнага дыстанцыявання і па магчымасці пазбягалі наведвання месцаў масавага збору людзей.