«ПВК «Вагнера» зазнае тое самае, што якудза ці камора»
- 28.01.2023, 17:14
ЗША прызналі «вагнераўцаў» транснацыянальнай злачыннай арганізацыяй.
Амерыканскае Мінфінансаў апублікавала інфармацыю аб кампаніях з Расеі, Кітая і Аб'яднаных Арабскіх Эміратаў, якія дапамагаюць «вагнераўцам». Іх актывы, рахункі і ўласнасць за мяжой павінны быць заблакаваныя. За супрацоўніцтва з імі будуць караць, паведамляе «Настоящее время».
«Вагнер» - злачынная арганізацыя, якая працягвае чыніць шырокамаштабныя злачынствы і парушаць правы чалавека. І мы будзем нястомна працаваць над выяўленнем, разбурэннем, выкрыццём і пераследам тых, хто ёй дапамагае», - заявіў Джон Кірбі, афіцыйны прадстаўнік Рады нацыянальнай бяспекі Белага дома.
Праз супрацу з «ПВК Вагнера» пад санкцыі патрапілі кампаніі з Расеі, Кітая і Аб'яднаных Арабскіх Эміратаў. Кітайская Spacety China прадавала наймітам спадарожнікавыя здымкі Украіны. Рабілі гэта праз пасярэдніка - расейскую кампанію «Тэра Тех2. Яна ўваходзіць у склад дзяржкарпарацыі «Раскосмас». І таксама патрапіла пад амерыканскія санкцыі. Яшчэ адна кампанія, якая дзялілася з расейскімі вайскоўцамі, уключаючы «вагнераўцаў», здымкамі з замежных спадарожнікаў, - навукова-вытворчы канцэрн «Барл». Гэта таксама расейская кампанія. З офісам у Маскве.
У Арабскіх Эміратах «ПВК Вагнера» дапамагала кампанія Kratol Aviation. Яны давалі наймітам самалёты для перавозкі персаналу і абсталявання паміж Цэнтральнаафрыканскай Рэспублікай, Лібіяй і Малі. Справа ў тым, што транснацыянальнай злачыннай арганізацыяй ПВК прызналі не толькі праз вайну ва Украіне. ЗША мяркуюць, што яна займалася дэстабілізацыяй у краінах Афрыкі і вінаватая ў масавых парушэннях правоў чалавека.
Яўген Прыгожын, уладальнік ПВК, на гэтыя абвінавачванні адказаў так: «Мы правялі ўнутраную праверку на прадмет злачынстваў «ПВК Вагнера», але нічога ганебнага не знайшлі. Таму, калі ў кагосьці ёсць інфармацыя аб злачынствах «ПВК Вагнера», просім даслаць яе нам у прэс-службу або публікаваць у СМІ. Для таго, каб мы маглі дапамагчы нашым амерыканскім калегам сфармаваць сваю пазіцыю».
Яўген Прыгожын, мякка кажучы, хітруе. Інфармацыі аб злачынствах ПВК больш чым дастаткова. У 2021 годзе CNN выпусціў вялікае расследаванне аб датычнасці расейскіх наймітаў да катаванняў і пакаранняў смерцю мірнага насельніцтва ў ЦАР. Пра гэта журналістам расказалі жыхары горада Бамбары. Аналагічнае расследаванне рабіла і французскае выданне RFI. Аднак і ў Крамлі сёння заявілі, што ні пра што такое не чулі.
Праз дзеянні ў ЦАР пад амерыканскія санкцыі патрапілі ахоўная фірма Sewa Security Services і «Садружнасць афіцэраў за міжнародную бяспеку», а таксама людзі, звязаныя з гэтымі арганізацыямі. Мінфін ЗША сцвярджае, што гэта, фактычна, даччыныя структуры «ПВК Вагнера».
Праграма санкцый у дачыненні да транснацыянальных злачынных арганізацый была запушчаная ў ЗША ў 2011 годзе. Тады ў Белым доме пастанавілі, што дзейнасць такіх структур дасягнула пагрозлівых маштабаў для стабільнасці міжнародных, палітычных і эканамічных сістэм.
Сярод такіх арганізацый, напрыклад, ірландскія наркатэрарысты - «Картэль Кінахана», а таксама пакістанскі кантрабандыст Абід Алі Хан. Ён пабудаваў сетку, якая дапамагала людзям без дакументаў прыязджаць у Злучаныя Штаты. ЗША абяцаюць мільён даляраў за інфармацыю, якая дапаможа яго злавіць. Таксама ў спісе японская мафіёзная групоўка «Ямагуці-гумі». На канец 2021 года ў ёй знаходзіліся блізу 8,5 тысячы актыўных чальцоў.
Асаблівай увагі заслугоўвае міжнародная злачынная арганізацыя «Братэрскае кола». У ёй, паводле інфармацыі ЗША, прысутнічае прозвішча расейскага спевака Рыгора Лепса, па пашпарце - Рыгора Лепсверыдзэ. Паводле інфармацыі амерыканскіх праваахоўнікаў, у «Братэрскім коле» Лепс адказваў за перавозку грошай. За гэта таксама патрапіў пад санкцыі.
Вось у такой кампаніі цяпер Яўген Прыгожын і яго ПВК. Таксама вядома, што ў пачатку снежня 2022 года амерыканскія сенатары падрыхтавалі законапраект аб прызнанні «ПВК Вагнера» тэрарыстычнай арганізацыяй.
Навіну «Настоящему времени» пракаментаваў Ігар Слабых - юрыст, аўтар тэлеграм-канала Uslegalnews:
- Цяпер «ПВК Вагнера» будзе тое ж самае, што японскія якудза або італійская камора. То бок, гэта такая група злачынцаў, якая дзейнічае на міжнародным узроўні. З пункту гледжання практычнай рэалізацыі гэтай пастановы, па вялікім рахунку, усё застаецца гэтак жа, як і было. Бо групоўка ўжо даўно занесеная ў амерыканскія санкцыйныя спісы.
Дзеянні ЗША супраць «ПВК Вагнера» пераносяцца з эканамічнага ўзроўню на крымінальна-прававы ўзровень. Калі цяпер нейкія краіны не хацелі далучацца да санкцый, нават баючыся другасных санкцый, цяпер для іх гэта будзе крыху па-іншаму гучаць. Гэта не нейкая прыватная кампанія, у дачыненні да якой уведзеныя амерыканскія санкцыі, а гэта ўжо міжнародная крымінальная групоўка, з якой змагаюцца Злучаныя Штаты Амерыкі. Гэта значыць, гучыць ужо крыху па-іншаму.
Але з практычнага пункту гледжання ўсё прыкладна гэтак жа, гэта значыць, забарона, блакаванне маёмасці на тэрыторыі ЗША, забарона на ўзаемадзеянне трэціх асоб. І, адпаведна, патэнцыйна магчымы пераслед гэтых трэціх асоб, якія супрацоўнічаюць з групоўкай, у далейшым сіламі ЗША.