СМІ: Пад Менскам перад Новым годам на карпаратыве забілі работніка ДАІ

• 28.01.2023, 18:21

Надзвычайнае здарэнне адбылося ў кавярні «Очаг» каля Бараўлян.

На адным з навагодніх карпаратываў у Менску быў забіты супрацоўнік Дзяржаўнай аўтаінспекцыі. Пра гэта паведамляюць крыніцы «Белсата».

Як адзначаецца, інцыдэнт адбыўся ўвечары 29 снежня ў кавярні «Очаг» каля Бараўлянаў, дзе ў той момант адразу некалькі ўстаноў адзначалі навагоднія карпаратывы, у тым ліку і ДАІ.

Ужо ў канцы карпаратыву адбылася вялікая бойка, «нейкі аўтаінспектар вытанцоўваў там без футболкі». Бойку спачатку ўдалося разняць, але потым яна пачалася зноў. Раптам жанчына пабегла выклікаць хуткую.

Відавочцаў бойкі пасля выклікалі ў міліцыю даваць сведчанні. Складзены фотаробат на пяць чалавек. Распачатая крымінальная справа паводле факту забойства з неасцярожнасці і выкарыстання халоднай зброі.

У сакратарыяце УДАІ ГУУС Менгарвыканкама на просьбу аб каментарыі перанакіравалі на іншы нумар тэлефона, але там ніхто не паднімаў слухаўку. У кавярні «Очаг» ад каментара наконт пераднавагодняга інцыдэнту адмовіліся:

«Ніякай інфармацыі мы не даем».

Не адзіная бойка?

27 студзеня тэлеграм-канал «Рэальная Беларусь» пісаў, што гэтымі днямі ў адной з рэстарацый Менска адбылася сур'ёзная бойка паміж работнікамі Следчага камітэта і міліцыянтамі.

Нібыта канфлікт адбыўся на глебе стаўлення да вайны ва Украіне, калі прадстаўнікі СК «вырашылі «правучыць» міліцыянтаў за іх негатыўнае стаўленне да ўзброенай агрэсіі».

Дата і месца здарэння пры гэтым не называліся. Ці сапраўды яно мела месца і ці не звязана з апісаным намі, невядома.

А як раней

Пераднавагодні інцыдэнт - гэта не першая бойка з удзелам сілавікоў у 2022 годзе ў Менску. Так, 21 чэрвеня ў жылым комплексе «Каскад» былы кіраўнік ГУБАЗіку і дзейны работнік Дэпартамента забеспячэння аператыўна-вышуковай дзейнасці МУС Андрэй Паршын каля свайго дома паспрабаваў разагнаць некалькіх падлеткаў. Пачалася бойка, ён быў на зямлі, а пасля стрэліў 16-гадоваму хлопцу ў нагу. Таго павезла хуткая.