У Сірыі самалёты разбамбілі калону іранскіх грузавікоў са зброяй

• 30.01.2023, 10:19

Знішчаны шэсць аўто.

Калона з 25 грузавікоў з Ірана, якія рухаліся праз Ірак у бок Сірыі, пацярпела ўдар самалётамі. Як паведамляе канал Al Arabia, у машынах магла ўтрымлівацца зброя для Корпуса вартавых Ісламскай рэвалюцыі.

Удар адбыўся паблізу падкантрольнага Хезбалы памежнага сірыйскага горада Аль-Букамалі. Знішчаны шэсць грузавікоў.

Неапазнаныя самалёты, якія бамбілі грузавікі, спачатку выпусцілі папераджальныя ракеты і дачакаліся, пакуль кіроўцы выйдуць з машын, перш чым бамбіць грузавікі.

Як паведамляў сайт Charter97.org, у ноч на 29 студзеня ў розных рэгіёнах Ірана прагрымелі магутныя выбухі і ўспыхнулі пажары на сама меней сямі прамысловых пляцоўках і вайсковых базах. Пад ударам БПЛА апынуліся цэнтры зборкі беспілотнікаў Shahed, вытворчасці боепрыпасаў, нафтаперапрацоўчыя прадпрыемствы - увогуле пашкоджаны 14 аб'ектаў, сярод іх не было ядзерных.