Мінабароны Беларусі абвясціла «спецыяльны збор» вайсковаабавязаных

• 3.10.2023, 9:52

Для паверкі мабілізацыйнай гатоўнасці.

Міністэрства абароны Беларусі абвясціла аб пачатку штогадовых заняткаў па мабілізацыйнай гатоўнасці, якія пройдуць па ўсёй краіне. Іх асаблівасцю стане аднадзённы збор для вайсковаабавязаных, якіх навучаць асновам і парадку дзеянняў падчас фармавання тэрытарыяльных войскаў.

Стартуюць заняткі па мабілізацыйнай гатоўнасці ўжо ў аўторак, 3 кастрычніка, і працягнуцца да пятніцы, 6 кастрычніка. Кіраваць мерапрыемствамі ў рамках вучэнняў будуць старшыні абласных выканаўчых камітэтаў, паведамілі ў Мінабароны.

Як растлумачылі ў ведамстве, галоўнай мэтай сёлетніх вучэнняў стане «павышэнне ўзроўню падрыхтоўкі і зладжанасці органаў кіравання тэрытарыяльнай абароны да фармавання тэрытарыяльных войскаў».

«Асаблівая ўвага будзе ўдзеленая падрыхтоўцы вайсковаабавязаных, якім у рамках аднадзённага збору будуць даведзеныя асновы і парадак дзеянняў падчас фармавання тэрытарыяльных войскаў», - заявілі ў Мінабароны.

Плануецца, што ва ўсіх адміністрацыйных раёнах правядуць як тэарэтычныя, так і практычныя мерапрыемствы з удзелам службовых асоб выканкамаў, а таксама вайсковых камісарыятаў і адміністрацый пунктаў прыёму мабілізацыйных рэсурсаў.

Нагадаем, напярэдадні Лукашэнка падпісаў указ аб прызначэнні палкоўніка Андрэя Расюка начальнікам галоўнай арганізацыйна-мабілізацыйнай управы. Гэтая вакансія заставалася свабоднай з 14 жніўня.