У Літву па Нёмане прыплыла «крыга» з кантрабандай з Беларусі

• 7.12.2023, 17:54

Да грузу быў прымацаваны GPS-перадатчык.

Літоўскія памежнікі знайшлі ў рацэ Нёман груз кантрабандных цыгарэтаў, замаскаваных пад крыгу. Гэта правераны часам метад кантрабандыстаў, расказалі ў памежнай службе Літвы.

Падазроную «крыгу» выявілі раніцай 5 снежня за 900 метраў ад мяжы з Беларуссю.

«Цыгарэтныя плыты спрабуюць замаскаваць і зрабіць падобнымі на крыгі. Адну такую “льдзіну” выцягнулі з Нямунаса памежнікі Друскінінкайскага пункта пропуску, які ахоўвае паўднёвы адрэзак мяжы з Беларуссю. На гэты раз з Беларусі было выпраўлена 500 пачкаў цыгарэтаў "Фэст"», – расказалі ў памежнай службе.

Блокі цыгарэтаў былі шчыльна абматаныя поліэтыленавай плёнкай, да грузу быў прымацаваны GPS-перадатчык для адсочвання ягонага месцазнаходжання.

У літоўскай памежнай службе адзначылі, што пасля пахаладання кантрабандысты штогод «выбіраюць правераны часам метад — спрабуюць замаскаваць плыты і зрабіць іх падобнымі на крыгі».

Кантрабанду абмотваюць белай поліэтыленавай плёнкай або медыцынскай марляй, пакрываюць змёрзлым снегам, лёдам і брудам, а для рэгулявання плыўнасці падбіраюць розныя будаўнічыя матэрыялы – цэгла, бетонныя блокі, брук і г.д. Перапраўляюць у асноўным па Нёмане – па гэтай рацэ праходзіць 17 км мяжы.

«На беларускім беразе кантрабандысты адчуваюць сябе вольна і дзейнічаюць бесперашкодна з боку памежнікаў гэтай краіны. Большую частку часу ў Нямунас на іншым беразе спускаюць грузы цыгарэтаў з прымацаванымі да іх GPS-навігатарамі ў надзеі, што плынь прынясе цыгарэты да берагу Літвы», – расказалі ў памежнай службе.