Папа рымскі Францішак пажартаваў пасля выпіскі з лякарні

• 1.04.2023, 12:41

На выхадзе пантыфік паразмаўляў з вернікамі і журналістамі.

Папа рымскі Францішак выпісаны з рымскай лякарні «Джэмелі», куды ён быў шпіталізаваны ў мінулую сераду з рэспіраторнай інфекцыяй, паведамляе тэлеканал Rai News.

Пры выхадзе са шпіталя пантыфік спыніўся, каб паразмаўляць з журналістамі і прысутнымі каля ўваходу вернікамі. Ён адказваў на пытанні і жартаваў.

– Як вы сябе адчуваеце? – спыталі ў Францыска.

– Усё яшчэ жывы, ведаеце, – з усмешкай адказаў ён.

Нагадаем, на мінулым тыдні ў пантыфіка былі цяжкасці з дыханнем, аднак кавід у яго не быў знойдзены. Францішак правёў у лякарні тры дні.

Цяпер у працоўным графіку 86-гадовага Францыска асабліва шмат падзей – з улікам падрыхтоўкі да Вялікадня, які сёлета будзе адзначацца 9 красавіка.

У гэтыя выходныя ў Ватыкане павінна адбыцца служба з нагоды ўваходу Гасподняга ў Ерусалім (або імша Пальмавай нядзелі).