З Украіны вылецеў чацвёрты цывільны самалёт за час поўнамаштабнай вайны

• 1.06.2023, 18:27

Самалёт вылецеў з аэрапорта «Львоў».

З Украіны ўдалося эвакуаваць яшчэ адзін цывільны самалёт - авіялайнер Airbus першага чэрвеня вылецеў са Львова і прызямліўся ў Варшаве.

Як паведамляе avianews, авіялайнер Airbus A330-300 з мальтыйскай рэгістрацыяй 9H-SME вылецеў раніцай са Львова і прызямліўся а 07:16 у Варшаве.

Адзначаецца, што перамяшчэнне паветранага судна зарэгістраваў анлайн-радар Flightradar24, калі авіялайнер перасёк мяжу Украіны, і пілоты ўключылі перадатчык самалёта.

Пасля Варшавы авіялайнер вылецеў у французскі горад Шатору, дзе самалёты праходзяць тэхнічнае абслугоўванне ці кансервацыю ў выпадку працяглага захоўвання.

Выданне паведамляе, што A330-300 прыбыў у Львоў 23 лютага 2022 года. Самалёт арандавала ўкраінская авіякампанія Ружа Вятроў для перавозкі грузаў.

2 красавіка 2022 года Ружа Вятроў эвакуявала са Львова самалёт ATR-72. 13 верасня 2022 года таксама са Львова свой Airbus A320 змог вывезці лаўкостэр Wizz Air. 4 красавіка 2023 г. змагла эвакуаваць свой апошні самалёт з аэрапорта Барыспаль ўкраінская авіякампанія SkyUp.

Акрамя цывільных, удалося эвакуаваць таксама два ваенна-транспартныя самалёты. 20 снежня 2022 года Турцыя вывезла два Airbus A400. Яны прыбылі ў Барыспаль у ноч з 23 на 24 лютага 2022 года і заставаліся заблакаванымі праз закрыццё паветранай прасторы Украіны.