Пентагон заключыў кантракт са SpaceX на пастаўку тэрміналаў Starlink Украіне

• 1.06.2023, 21:12

Ва Украіне цяпер працуе 42 тысячы тэрміналаў спадарожнікавай інтэрнэт-сувязі.

Міністэрства абароны ЗША заключыла кантракт на закупку ў кампаніі SpaceX тэрміналаў Starlink для абаронцаў Украіны. Пра гэта паведамляе агенцтва Bloomberg.

Хутчэй за ўсё, тэрміналы набудуць у рамках Ініцыятывы спрыяння бяспецы Украіны, сказана ў матэрыяле.

«Мы разам з глабальнымі партнёрамі працуем над тым, каб забяспечыць Украіну ўстойлівымі спадарожнікавымі і камунікацыйнымі магчымасцямі, якія ёй неабходныя. Спадарожнікавая сувязь – жыццёва важны ўзровень у агульнай сетцы сувязі Украіны, і ўстанова заключае кантракты са Starlink на паслугі такога тыпу», – заявілі ў Пентагоне.

Ва ўстанове не расказалі падрабязнасці пра кантракты, партнёраў або «канкрэтныя магчымасці», спаслаўшыся на меркаванні бяспекі.