Беспілотнікі атакавалі расейскі Курск

• 2.06.2023, 7:37

Тутэйшыя жыхары паведамляюць аб «партызанах» каля горада.

Уночы ў пятніцу, 2 чэрвеня, у Курску грымнулі магутныя выбухі. Тутэйшыя жыхары заявілі, што кананаду выбухаў асабліва добра было чуваць ля чыгуначнага вакзала, паведамляюць украінскія мэдыі.

У мясцовых Telegram-каналах заяўляюць, што прычына выбухаў - атака невядомых беспілотнікаў на месцы.

«Моцна бахнула ля чыгункі», - пішуць жыхары Курска. Пазней было апублікаванае відэа выбухаў каля чыгуначнага вакзала.

Губернатар Курскай вобласці РФ Раман Старавойт заявіў, што над Курскам нібыта было «збіта некалькі ўкраінскіх беспілотнікаў».

«Сёння ўночы побач з Курскам сістэмай СПА збітыя некалькі ўкраінскіх беспілотнікаў. Просім курчан захоўваць спакой», - заявіў губернатар Курскай вобласці.

Напярэдадні ён паведамляў, што з дрона быў скінуты баявы прыпас на электрычную падстанцыю, у выніку сяло Гогалеўка Суджанскага раёна было абясточаная.

Тутэйшыя жыхары ў каментарах да такіх навін пішуць, што прагучала ўжо 7 магутных выбухаў - іхнія дамы скаланаюцца.

Тутэйшы жыхар Курскай вобласці паведаміў аб невядомых узброеных людзях у вайсковай форме, якія «праскочылі» перад ягоным самаходам учора ў лесе.

На відэа заўважныя некалькі мужчын са зброяй і ў камуфляжы, якія перабягаюць лясную дарогу. «Ад мясцовых уладаў, як заўсёды, цішыня і нічога не адбываецца» - скардзіцца жыхар Курска.