Польскі ўрад: Бязвіз на «Славянскі базар» - нагода для новай хвалі нелегальнай міграцыі

• 2.06.2023, 11:22

У Польшчы асцерагаюцца абвастрэння міграцыйнага крызісу на мяжы з Беларуссю.

Расея і Беларусь працягваюць гібрыдную аперацыю з выкарыстаннем мігрантаў, накіраваную на дэстабілізацыю Еўропы, у тым ліку Польшчы, заявіў дзяржаўны сакратар канцылярыі прэм'ер-міністра, намеснік міністра - каардынатара спецыяльных службаў Польшчы Станіслаў Жарын.

«Маршрут нелегальнай міграцыі, які вядзе з Беларусі на Захад, застаецца актыўным і падтрымлівае міграцыйны ціск на нашу ўсходнюю мяжу», — заявіў ён.

Ён назваў патэнцыяльнай новай падставай для прыцягнення мігрантаў з краін падвышанай рызыкі ў Беларусь міжнародны музычны фестываль «Славянскі базар у Віцебску».

Бязвізавы рэжым для яго ўдзельнікаў і гасцей, на думку Жарына, можа прывесці да павелічэння прытоку людзей у Беларусь, што будзе «выкарыстана беларускімі спецслужбамі для актывізацыі гібрыднай аперацыі, якая праводзіцца на нашай усходняй мяжы».

30 сакавіка Лукашэнка падпісаў распараджэнне, якім зацверджаны тэрміны фестывалю - асноўныя мерапрыемствы пройдуць з 13 да 16 ліпеня. У мэтах «пашырэння аўдыторыі гледачоў» распараджэннем прадугледжаны бязвізавы парадак уезду ў Беларусь для ўдзельнікаў і гасцей з 73 дзяржаў.

Як зазначыў Дзяржаўны памежны камітэт Беларусі, для бязвізавага ўезду ў краіну гэтай катэгорыі іншаземцаў неабходна мець сапраўдны дакумент для выезду за мяжу, а таксама арыгінальныя або электронныя білеты на мерапрыемствы фестывалю ў Летнім амфітэатры або канцэртнай зале «Віцебск».