«Яны яго ненавідзяць»: у асяроддзі Пуціна спее новы бунт

• 22.09.2023, 17:55

Кіраўніком РФ пагарджаюць за слабасць і баязлівасць.

Легітымнасць Пуціна ва ўспрыманні ягонага асяроддзя — гэта легітымнасць «хроснага бацькі», які кіруе злачыннай групоўкай, расказаў у інтэрвію «МО» палітык Леанід Гозман.

«Але хросны бацька — гэта не сінэкура, гэта праца. Ён павінен працаваць, штодзень — здымаць канфлікты, дамаўляцца. Уладзімір з гэтай працай упраўляецца ўсё горш і горш. Гэта бачаць ягоныя калегі з высокага паверху. Ён павінен даводзіць ім, што яшчэ моцны. Калі быў путч Прыгожына, Пуцін зняславіўся. Было відаць, што яго ніхто не абараняе, сілы за ім няма. Ён збаяўся, уцёк з Масквы. Ён быў неадэкватны — выйшла ягонае віншаванне з днём моладзі, калі Прыгожын ужо ўзяў Растоў-на-Доне. І ён выявіў слабасць і баязлівасць пасля таго, як Прыгожын адмовіўся ад свайго плана. Пуцін не наважыўся яго пакараць, а прыняў у Крамлі».

Прыгожын "праклаў каляіну" для будучых бунтаў, мяркуе Гозман.

«Усе вайскоўцы ўбачылі, як лёгка гэта зрабіць. Думаю, яны хочуць замяніць Пуціна, яны яго ненавідзяць. Калі б ён узяў Кіеў за тры дні, яго б падтрымлівалі. А ён зняславіўся — ягоныя загады не выконваюцца, усё, што ён абяцае, не робіцца».

Тым не менш, арганізаваць новы бунт людзям з асяродку Пуціна будзе вельмі няпроста, кажа палітык.

«Калі граф Пален наважыў прымусіць імператара Паўла I адцурацца, або забіць яго — ён мог сабраць некалькіх паплечнікаў, паставіць ад'ютанта пры дзвярах — і яны спрэс спакойна маглі пагаварыць паміж сабой. Цяпер у таварышаў, якія могуць гэта зрабіць, усюды пастаўленае праслухоўванне. Як ім дамовіцца? Можа генералы і хацелі б гэта зрабіць, але дзе ім гаварыць? І ўсе разумеюць, што стары баявы таварыш адразу пасля размовы можа пабегчы даказваць».

«Вельмі складана арганізаваць такую змову, але ў нейкі момант яна ўсё адно адбудзецца. Трыгерам будзе параза на фронце», — падсумаваў Гозман.