Сабчак сцвярджае, што ёй патэлефанаваў Кадыраў

• 26.09.2023, 9:12

Чачэнскі кіраўнік нібыта «папярэдзіў» расейскую журналістку.

Расейская журналістка Ксенія Сабчак сцвярджае, што ёй патэлефанаваў кіраўнік Чачэніі Рамзан Кадыраў. Яна расказала пра 40-хвілінную размову праз відэасувязь. Аўтарскі пераказ гутаркі яна апублікавала ў тэлеграм-канале «Крывавая пані». Абмяркоўвалі відэа, на якім сын кіраўніка Чачэніі Адам збівае «падпальшчыка Карана» Мікіту Журавеля.

Частку дыялогу Сабчак падае ў цытатнай форме.

- Чаму ты чапаеш майго сына?

- Ну вы ж самі выклалі відэа да сябе ў канал і напісалі, што ганарыцеся, навошта вы гэта выклалі і напісалі?

- Я не хачу гэта хаваць, няма ніякага сэнсу гэта хаваць.

- А вы яго пакаралі пасля гэтага?

- Не, ён малайчына, ён павёў сябе як сапраўдны мужчына.

Са слоў Сабчак, Кадыраў запатрабаваў не пісаць пра ягоную сям'ю і зрабіў ёй «папярэджанне».