Лукашэнка дапамог скрасці тысячы ўкраінскіх дзяцей

• 11.10.2024, 10:59

І пачаў гэта рабіць яшчэ да вайны.

За апошнія тры гады ў Беларусь было вывезена 2 219 украінскіх дзяцей з тэрыторый, якія знаходзяцца пад расейскай акупацыяй. Пра гэта ішла размова на брыфінгу Міжнароднай групы праваабарончых арганізацый, у якую ўваходзіць Цэнтр правоў чалавека Центр прав человека ZMINA.

Адзначаецца, што вывозіць дзяцей з акупаванай часткі Данбаса ў Беларусь пачалі яшчэ з другой паловы 2021 года, і гэты працэс працягваўся як мінімум да чэрвеня 2024 года. Пры гэтым часцей за ўсё дзяцей вывозілі менавіта падчас навучальнага года.

Хоць акупанты сцвярджалі, што вывозяць дзяцей часова на адпачынак, напраўду з імі праводзілі індактрынацыю, гэта значыць палітычнае і культурнае «перавыхаванне». Частку дзяцей накіроўвалі ў беларускія школы, дзе іх навучаюць паводле праграмы, падобнай да расейскай, у якой поўна крамлёўскай прапаганды. Пры гэтым беларуская дзяржава ідэнтыфікуе ўкраінскіх дзяцей у Беларусі як "расейцаў" і прызнае навязанае ім расейскае грамадзянства.

Праваабаронцы таксама знайшлі доказы залучэння ўкраінскіх дзяцей да ўдзелу ў ваенізаваных моладзевых арганізацыях Беларусі. Таксама сярод дзяцей прапагандуюць службу ва ўзброеных сілах Расеі.

Праваабаронцы зазначаюць, што лічба на 2 219 дзяцей, якіх вывезлі ў Беларусь, з'яўляецца няпоўнай, бо ўключае толькі тыя выпадкі, у якіх ёсць пераканаўчыя довады.