Расейскія чыноўнікі бунтуюць супраць прызначэнцаў, якія прыйшлі з «СВА»
- 11.10.2024, 16:18
Яны не могуць «звязаць двух слоў».
Прызначаныя ў Савет Федэрацыі на патрабаванне Пуціна ўдзельнікі вайны ва Украіне не могуць убудавацца ў расейскую палітычную сістэму, распавялі «Вёрстцы» крыніцы ў верхняй палаце парламента.
Усяго на пратэкцыю Крамля сенатарамі сталі трое былых вайскоўцаў: Амыр Аргамакаў ад рэспублікі Алтай, Юрый Німчанка ад акупаванага Крыма і Аляксей Кандрацьеў ад Курскай вобласці.
30-гадовы Аргамакаў у 2024 годзе атрымаў званне Герой Расеі і ўзначаліў Саюз ветэранаў СВА ў сваім рэгіёне. Са слоў суразмоўцы «Вёрсткі», ён не хацеў будаваць палітычную кар'еру, але ў Крамлі яго «вельмі папрасілі» пайсці ў Савет федэрацыі. Гэта трэба было, каб прадэманстраваць «сацыяльныя ліфты» і давесці, што вайскоўцы ў цывільным жыцці добра працаўладкаваныя, патлумачыла крыніца выдання. Аднак Аргамакаў пакуль не здольны «ўбудавацца ў парламент». Ён «як белая варона» і «двух слоў звязаць не можа», кажа іншы прадстаўнік Савета федэрацыі.
Другі прызначаны сенатарам «ветэран» - былы танкіст Юрый Німчанка, Герой Расеі і давераная асоба Пуціна. Пры гэтым, са слоў суразмоўцаў «Вёрсткі», у новага сенатара няма вышэйшай адукацыі, а сам ён «дуб-дубам». Прадстаўнікі парламента не прынялі былога вайскоўца і «не маюць стасункаў з ім», сцвярджаюць крыніцы выдання.
Трэці былы вайсковец, які атрымаў пасаду ў Савеце федэрацыі, - Аляксей Кандрацьеў - раней ужо быў сенатарам, але ў 2020 пайшоў з пасады, а ў 2022-м завербаваўся на вайну. Хоць у яго чатыры ордэны Мужнасці, на справе Кандрацьеў - «чыноўнік у табары вайскоўцаў», адзначае знаёмы з ім сенатар. Ён служыў у атрадзе «БАРС», але гэта элітнае падраздзяленне, у якім адседжваюцца чыноўнікі і іншыя высокапастаўленыя людзі з тым, каб потым вярнуцца з вайны і заняць высокія пазіцыі, сцвярджае суразмоўца «Вёрсткі».
Таксама, як раней пісалі «Ведомости», чатыры ўдзельнікі вайны праходзілі стажыроўку ў адміністрацыі Пуціна і павінны былі неўзабаве прыступіць да працы. Аднак, паводле «Вёрсткі», трое з іх так і не былі ўладкаваныя ва ўправу ўнутрыпалітычнага блока Крамля. Чацвёртага – сепаратыста з Данбаса Арцёма Жогу - Пуцін прызначыў сваім паўнамоцным прадстаўніком ва Уральскай федэральнай акрузе.
У снежні 2023-га Жога папрасіў Пуціна балатавацца на новы тэрмін і падкрэсліў, што зрабіў гэта ад імя жыхароў усіх акупаваных украінскіх тэрыторый. Пуцін пагадзіўся, пасля чаго Жогу прызначылі адным з трох сустаршыняў яго перадвыбарчага штаба.
У пачатку 2024 года Пуцін заявіў, што ўдзельнікі вайны ва Украіне стануць «сапраўднай элітай», якой можна будзе «перадаць Расею». З яго слоў, на фронце знаходзяцца 600 тысяч чалавек, якія «павінны стаць асновай дзяржавы расейскай». «Людзі, якія прайшлі горан баявых выпрабаванняў, патрэбныя айчыне ва ўсе часы», – падкрэсліваў Пуцін.v