«Коммерсантъ» намякнуў на жабраванне Лукашэнкі

• 12.10.2024, 8:25

Беларусь стала «разгрузачным цэхам».

Журналіст «Коммерсанта» Андрэй Калеснікаў падзяліўся ўражаннямі ад уручэння кіраўніку Беларусі ў Крамлі 9 кастрычніка расейскага ордэна Андрэя Першазванага. Аглядальнік у традыцыйнай манеры закрануў Лукашэнку:

- Яшчэ з савецкіх часоў Беларусь называлі зборачным цэхам Савецкага Саюза, - нечакана вымавіў спадар Пуцін. - І дзякуючы вашым намаганням гэтыя пэўныя перавагі ў галіне эканомікі, прамысловай вытворчасці за Беларуссю захаваліся.

Цяпер, праўда, Беларусь язык неяк не паварочваецца называць зборачным цэхам. Хутчэй гэта цэх разгрузачны - для расейскіх грошай, якія краіна пералічвае на падтрыманне і развіццё беларускай эканомікі, каб Беларусь магла падтрымліваць і развіваць расейска-беларускія стасункі, - намякнуў на жабраванне Лукашэнкі Калеснікаў.

- Учора і пазаўчора мы мелі магчымасць абмеркаваць глабальнага характару пытанні, гарачыя месцы на нашай планеце, - прызнаўся Уладзіміру Пуціну Аляксандр Лукашэнка.

Ён заўсёды рады пагаварыць з калегам пра міжнародны парадак дня, пра глабальныя пытанні. Вядома, заўсёды хочацца, а няма з кім. Бо больш ніхто і размаўляць не хоча. І хто не хоча, той супраць нас.

І нехаця пачынаеш шанаваць тое нямногае, што ў цябе застаецца. Вось яны і цягнуцца адзін да аднаго, і становяцца ўсё больш хаўруснымі і хаўруснымі, - рэзюмаваў журналіст.