F-16 збіў расейскі Су-34: Раскрытыя падрабязнасці паветранай бітвы

• 13.10.2024, 12:58

Гэта можа стаць першым пацверджаным выпадкам.

Недалёка ад лініі фронту, прыкладна за 50 кіламетраў, быў збіты расейскі знішчальнік-бамбавальнік Су-34.

Удар па самалёце краіны-агрэсаркі РФ мог нанесці ўкраінскі знішчальнік F-16 Fighting Falcon, піша Forbes.

Выданне нагадвае, што першыя F-16 прыбылі ва Украіну ў жніўні. Калі інфармацыя пра збіццё пацвердзіцца, гэта стане першым выпадкам, калі амерыканскі самалёт атрымаў перамогу над пілатаваным расейскім знішчальнікам.

У матэрыяле звяртаецца ўвага на тое, што расейскія вайсковыя прапагандысты адразу адрэагавалі на страту самалёта РФ. Некаторыя з іх папярэджваюць, што «NATO выправіла F-16 на паляванне» і што такія страты толькі павялічацца.

Пры гэтым прапагандысты РФ унікаюць крытыкі на адрас дыктатара Уладзіміра Пуціна, факусуючы сваю незадаволенасць на ваенным камандаванні.

Як адзначыў эксперт нацыянальнай бяспекі Мэцью Шміт, яны крытыкуюць войска за некампетэнтнасць, але падтрымліваюць Пуціна, заклікаючы яго да кадравых зменаў у ваенных структурах.

Журналісты нагадваюць, што Су-34 быў распрацаваны ў 1980-я гады для ВПС СССР, афіцыйна стаў на ўзбраенне ў 2014 годзе. Гэты самалёт называўся адным з самых магутных у расейскім арсенале, і ягоная страта з'яўляецца сур'ёзным ударам для Масквы, якая змагаецца з падтрыманнем вытворчасці новых самалётаў.

Раней пра страту знішчальніка Су-34 разам з экіпажам паведамлялі расейскія СМІ.