Над Сірыяй «засвяціўся» расейскі самалёт-выведчык Ан-30

• 14.10.2024, 9:48

Такіх засталося ўсяго чатыры.

У сацыяльных сетках з'явілася відэа палёту выведвальнага самалёта Ан-30 са складу ВКС Расеі ў небе над Сірыяй. Кадры зняты ў раёне горада Ідліб, на захад ад Алепа.

Гэты самалёт выконваў чарговы палёт на фоне паведамленняў аб магчымым наступленні сірыйскай апазіцыі ў кірунку Алепа.

Відэа сведчыць аб тым, што Расея працягвае выкарыстоўваць рэдкі тып выведвальных самалётаў, такіх як Ан-30, чый палёт у сучасных умовах з'яўляецца нечаканасцю.

На ўзбраенні ВКС Расеі застаецца ўсяго чатыры самалёты Ан-30, тады як разведвальных Су-24МР - каля паўсотні. На працягу лета 2024 года неаднаразова паведамлялася аб "небяспечным збліжэнні" самалётаў заходніх краін з расейскімі Ан-30 падчас палётаў над Сірыяй, аднак толькі зараз удалося зафіксаваць гэты самалёт на відэа.

Як піша Defense Express, асаблівасць Ан-30 у тым, што гэта самалёт для аэрафотаздымкі, што патрабуе прамога пралёту над мэтай, што магчыма толькі пры адсутнасці сістэм супрацьпаветранай абароны. Менавіта таму расейцы выкарыстоўваюць гэтыя самалёты толькі ў сірыйскай паветранай прасторы, дзе магчымых пагроз для іх няма.

Асноўныя характарыстыкі Ан-30:

даўжыня фюзеляжа: 24,26 м, размах крылаў: 29,02 м;

максімальная ўзлётная маса: 23 тоны, маса фотаапаратуры: 650 кг;

максімальная хуткасць: 540 км/г;

далёкасць палёту: 1240 км;

экіпаж: 6 чалавек + 1 аператар.