Зяленскі ў Вярхоўнай Радзе прадставіць план перамогі

• 14.10.2024, 19:37

Выступ запланаваны на 16 кастрычніка.

У сераду, 16 кастрычніка, прэзідэнт Украіны Уладзімір Зяленскі выступіць у Вярхоўнай Радзе. Пра гэта паведаміў дарадца кіраўніка Офіса прэзідэнта Сяргей Лешчанка.

«Відавочна, цяпер толькі адна прычына для гэтага мерапрыемства - гэта публічнае прадстаўленне плана перамогі», - напісаў Лешчанка, не раскрываючы дэталяў.

Два суразмоўцы Liga.net - у Офісе прэзідэнта і ў кіраўніцтве фракцыі «Слуга народа» пацвердзілі гэтую інфармацыю.

Амбасадар Украіны ў Нямеччыне Аляксей Макееў у эфіры нямецкага тэлеканала ZDF паведаміў, што на днях украінцам могуць раскрыць дэталі плана перамогі.