Bloomberg: У Расеі рыхтуюцца адпусціць курс рубля
- 15.10.2024, 12:23
100 рублёў за даляр - рэальнасць.
Расейскі рубель рухаецца да адзнакі 100 за даляр. Адзначаецца, што паслабленне рубля зараз не выклікае трывогі і пойдзе на карысць бюджэту краіны на фоне планаў аб павелічэнні выдаткаў у 2025 годзе.
Выданне Bloomberg піша, што Банк Расеі спадзяецца на міжбанкаўскія аперацыі для разліку курсу рубля з таго часу, як Маскоўская біржа прыпыніла таргі далярамі і еўрамі праз санкцыі ЗША. Карныя меры пагоршылі дэфіцыт замежнай валюты, і, паводле звестак цэнтрабанка РФ, рубель зараз прыкладна на 9% слабейшы, чым у апошні гандлёвы дзень. 12 кастрычніка скончыўся тэрмін, усталяваны ЗША для спынення аперацый на біржы.
За той жа перыяд рубель знізіўся ў дачыненні да кітайскага юаня, які стаў асноўнай альтэрнатывай валютам, якія Крэмль лічыць "таксічнымі". Расейская валюта ўпала на 11% у дачыненні да юаня на Маскоўскай біржы да 13,26 - самага нізкага ўзроўню з траўня.
Летась расейская валюта двойчы пераадольвала адзнаку на 100 рублёў за даляр. Цэнтральны банк адрэагаваў на гэта падвышэннем ключавой працэнтнай стаўкі на 350 базісных пунктаў на экстраным пасяджэнні ў жніўні 2023 года. Затым у кастрычніку ўрад увёў больш жорсткія меры кантролю за рухам капіталу, запатрабаваўшы ад 43 груп экспарцёраў рэпатрыяваць 80% валютнай выручкі і амаль усю яе прадаць за рублі на ўнутраным рынку.
Прагнозы Міністэрства эканомікі паказваюць, што ўрад плануе паслабленне валюты: чыноўнікі чакаюць, што ў 2025 годзе за даляр будуць даваць у сярэднім 96,5 рубля ў параўнанні з 91,2 сёлета.
«Нядаўняе паслабленне рубля адлюстроўвае цяжкасці з знешнегандлёвымі плацяжамі, з якімі сутыкаюцца імпарцёры і экспарцёры», – кажа Зміцер Палявы, дырэктар у інвестыцыях маскоўскай кампаніі «Астра Эсет Мэнэджмэнт».
Кампаніі атрымліваюць менш замежнай валюты і адчуваюць больш праблем з яе вяртаннем у Расею з такіх краін, як Кітай і Турцыя. У адказ на гэты ўрад змякчыў меры, якія падтрымлівалі рубель - абавязковая канвертацыя экспартнага даходу была зніжаная ўдвая - да 25% з 50%. Гэта рушыла ўслед за пастановай аб зніжэнні патрабавання аб рэпатрыяцыі даходу да 60% у чэрвені, а затым да 40% месяцам пазней.
Са звестак Банка Расеі, у верасні продажы валюты найбуйнейшымі расейскімі экспарцёрамі скараціліся на 30% у параўнанні са жніўнем, бо ўсё большая дзель разлікаў ажыццяўлялася ў рублях.
У сваю чаргу Наталля Мільчакова, аналітык Freedom Finance Global у Казахстане, адзначыла, што банку давядзецца выкарыстоўваць грашова-крэдытную палітыку, каб кампенсаваць пабочную шкоду ад слабага рубля ў выглядзе высокай інфляцыі.