Мянчук дзіўным чынам хацеў уразіць дзяўчыну

• 16.10.2024, 9:11

На яго завялі крымінальную справу.

Мянчук забраўся на капот чужога аўто, спрабуючы ўразіць дзяўчыну. Падрабязнасці расказалі ў прэс-службе ГУУС Менгарвыканкама.

У паведамленні сказана, што ў Маскоўскае РУУС звярнулася мянчанка, у якой невядомыя пашкодзілі капот машыны. Падчас аператыўна-вышуковых мерапрыемстваў супрацоўнікі міліцыі ўстанавілі і затрымалі падазраванага. Ім быў 35-гадовы жыхар Менска.

Удалося ўстанавіць, што мужчына разам са сваёй знаёмай пасля супольнага распівання алкагольных напояў пайшлі на начны шпацыр. Мужчына, выйшаўшы з пад'езда, надумаў уразіць сваю дзяўчыну і залез на капот аўтамабіля Geely Coolray, які быў прыпаркаваны ў двары.

«Агульная сума шкоды склала больш за 2 200 рублёў», - распавялі ў міліцыі.

Паведамляецца, што была заведзеная крымінальная справа за хуліганства.