З'явіліся падрабязнасці ўдару УСУ па палігоне акупантаў на Запарожжы

• 16.10.2024, 10:35

Камандзіры падставілі расейскіх вайскоўцаў.

УСУ шостым разам за восем месяцаў паспяхова знішчылі групу расейскіх акупантаў падчас вучэнняў на палігоне. Як піша Forbes, гаворка ідзе аб адкрытым агнявым палігоне ў Запарожскай вобласці на поўдні Украіны, а ўдар зрабілі ракетай M30/31 з РСЗА HIMARS, начыненай 400 суббоепрыпасамі.

"Украінскі выведвальны беспілотнік заўважыў блізу 15 расейскіх салдат, якія трэніраваліся, і перадаў каардынаты падраздзяленням 27-й ракетна-артылерыйскай брыгады, адзінага падраздзялення ўкраінскага войска, якое эксплуатуе пускавыя ўстаноўкі высокамабільных артылерыйскіх ракетных сістэм амерыканскай вытворчасці", — гаворыцца ў публікацыі.

Адзначаецца, што ракета патрапіла проста ў цэль, і колькасць загінулых акупантаў можа апынуцца катастрафічнай для мэтавага падраздзялення.

У Forbes акцэнтавалі, што расейскія войскі рэгулярна праводзяць вучэнні на адкрытым паветры ў межах дасяжнасці найлепшых амерыканскіх ракет Украіны, і гэта рызыкоўная практыка адлюстроўвае адсутнасць прафесіяналізму ў расейскім войску.

“Ёсць значна больш сведчанняў украінскіх удараў па неабароненых расейскіх навабранцах, чым сведчанняў расейскіх удараў, - адзначаецца ў артыкуле. - Магчыма, вінаватыя нядбайныя і неспрактыкаваныя расейскія камандзіры. Але таксама магчыма, што камандзірам проста ўсё адно, ці знаходзяцца іх стажоры ў небяспецы”, - піша Forbes.