Еўразвяз мае намер ізаляваць Расею

• 16.10.2024, 11:37

Адбудзецца першы саміт з краінамі Персідскай затокі.

16 кастрычніка Еўразвяз праводзіць свой першы саміт з краінамі Персідскай затокі, накіраваны на ўмацаванне сувязяў з дзяржавамі гэтага рэгіёна для атрымання міжнароднай падтрымкі ў ізаляцыі Расеі. Пра гэта паведамляе Reuters (пераклад - liga.net).

Пасля поўнамаштабнага ўварвання Расеі ва Украіну ЕЗ актывізаваў супрацоўніцтва з рознымі рэгіянальнымі блокамі, уключаючы краіны ASEAN і CELAC.

ДАВЕДКА

ASEAN (Асацыяцыя дзяржаў Паўднёва-Усходняй Азіі) - гэта рэгіянальная арганізацыя, якая аб'ядноўвае 10 краін Паўднёва-Усходняй Азіі: Інданезію, Малайзію, Тайланд, Філіпіны, Сінгапур, Брунэй, В'етнам, Лаос, М'янму і Камбоджу. Яна накіраваная на палітычнае і эканамічнае супрацоўніцтва.

CELAC (Супольнасць краін Лацінскай Амерыкі і Карыбскага басейна) - гэта рэгіянальны блок, які ўключае 33 краіны Лацінскай Амерыкі і Карыбскага басейна, накіраваны на каардынацыю супрацоўніцтва ў розных сферах.

Асноўная мэта саміту з шасцю багатымі арабскімі дзяржавамі ў Радзе аб супрацоўніцтве арабскіх дзяржаў Персідскай затокі ў тым, каб зрабіць стасункі больш стратэгічнымі, тлумачыць Reuters.

“Рэгіён Персідскай затокі знаходзіцца на скрыжаванні паміж Азіяй, Еўропай і Афрыкай. Ён адыгрывае вельмі важную ролю ў шматлікіх сучасных крызісах”, - заявіў чыноўнік ЕЗ.

Партнёрства паміж ЕЗ і краінамі Персідскай затокі будзе ахопліваць гандаль, інвестыцыі, аднаўляльную энэргетыку, рэгіянальную бяспеку, а таксама грамадзянскія пытанні, у тым ліку візавыя рэжымы. Хаця Брусэль спадзяецца на больш жорсткую пазіцыю гэтых краін у дачыненні да Расеі, поўнага прыняцця такой пазіцыі не чакаецца.

Перамовы аб пагадненні аб свабодным гандлі паміж ЕЗ і краінамі Персідскай затокі прыпыненыя з 2008 года, аднак працягваюцца дыскусіі аб іншых шляхах для гандлёвага супрацоўніцтва, з ААЭ, якія хочуць асобнага гандлёвага пакта з ЕЗ. Адзін з запытаў краін Персідскай затокі - спрашчэнне візавага рэжыму для іх грамадзян.