Названы самыя крымінальныя раёны Беларусі

• 16.10.2024, 12:32

Узровень злачыннасці ў Беларусі з 2018-га да 2023-га вырас амаль на 5%.

Летась у Беларусі было зарэгістравана ў сярэднім 930 злачынстваў на кожныя 100 тысяч жыхароў, што на 42 выпадкі больш, чым у 2018 годзе, калі гэты паказчык складаў 888.

Паводле інфармацыі Белстата, на працягу апошніх пяці гадоў назіраецца зніжэнне ўзроўню злачыннасці ў Віцебскай і Менскай абласцях. Аднак у іншых рэгіёнах сітуацыя ідзе інакш - тут узровень злачыннасці ўзрос.

Найбольшая колькасць правапарушэнняў зафіксавана ў Асіповіцкім раёне Магілёўскай вобласці і Добрушскім раёне Гомельскай вобласці, дзе ў 2023 годзе на 100 тысяч жыхароў прыпадала больш за 1 450 злачынстваў. Гэта ў паўтара раза перасягае сярэдні паказчык у краіне.

Замыкае тройку лідараў у колькасці злачынстваў Клічаўскі раён Магілёўскай вобласці з паказчыкам 1386 злачынстваў на 100 тысяч чалавек.

Сярод самых спакойных раёнаў вылучаюцца тры раёны Віцебскай вобласці: Шаркаўшчынскі (478 злачынстваў на 100 тысяч жыхароў), Докшыцкі (553) і Глыбокі (601).

Трэба адзначыць, што агулам па краіне колькасць злачынстваў у 2023 годзе знізілася ў параўнанні з папярэднім годам, 2022-м.