Дзяржстандарт забараніў прадаваць два расейскія і адзін беларускі сродак для мыцця

• 16.10.2024, 14:07

Тавары з'явіліся ў спісе небяспечнай прадукцыі.

Два сродкі для мыцця расейскай кампаніі «ГД Грас» і капсулы беларускай «Экліпс Кемікалс» забаранілі прадаваць у Беларусі. Тавары з'явіліся ў спісе небяспечнай прадукцыі.

Пад забарону патрапілі гель-канцэнтрат для мыцця Dory для каляровай бялізны, а таксама канцэнтраваны вадкі сродак Alpi white gel для белай. Іх выпускае ТАА «ГД Грас» у Валгаградзе.

Расейскія сродкі для мыцця не прайшлі праверку ў паказчыку «пенаўтваральная здольнасць»: пры норме, не большай за 180 мм ён склаў ад 197 да 206 мм. У Дзяржстандарце мяркуюць, што гэта ўводзіць у зман спажыўца прадукцыі наконт яе прызначэння, якасці і бяспекі і можа быць небяспечным для пральных машын з франтальнай загрузкай.

Пад забарону таксама патрапілі беларускія капсулы для мыцця гандлёвай маркі Kuper clean Universal. Іх вырабляе сталічнае ТАА «Экліпс Кемікалс». Вытворца ў маркіроўцы паказаў прызначэнне прадукцыі «для выкарыстання ў пральных машынах усіх тыпаў», але пры гэтым капсулы не могуць выкарыстоўвацца як сродак для мыцця ў пральных машынах з франтальнай загрузкай, бо паказчык «пенаўтваральная здольнасць» пры норме, не большай за 180 мм, склаў 226 мм.

Усе гэтыя мыйныя сродкі забаранілі прадаваць з 21 кастрычніка.