«Пуцін укараняе ў аператыўную гульню былога агента КДБ Лукашэнку»
- 29.10.2024, 9:23
Разыгрываецца спектакль.
Telegram-канал «Беларуская разведка» прадставіў сваю версію таго, чаму Лукашэнка ўсё больш нейтральна выказваецца аб вайне ва Украіне. Гаворка ідзе пра адзін з самых эфектыўных інструментаў працы ўсіх спецслужбаў — укараненне:
- Усё проста: Пуцін, як былы аператыўнік КДБ, укараняе ў працяглую аператыўную гульню былога агента КДБ Лукашэнку. Мэта ўкаранення - стварэнне перамоўнага працэсу і арганізацыя перамоўнай пляцоўкі для спынення вайны ва Украіне. Пуцін і Лукашэнка дамовіліся супольна рэалізаваць план, аператыўная задума якога зводзіцца да стварэння лёгкай фальшывай лініі напружання паміж Менскам і Масквой, пераканання Захаду і Украіны ў жаданні Лукашэнкі захаваць незалежнасць ад Крамля і яго актыўным супрацьдзеянні расейскай экспансіі ў Беларусь.
У выніку Крэмль і Менск павінны стварыць устойлівы імідж міратворца для Лукашэнкі, які адзіны зможа пасадзіць «двух сваіх братоў» за стол перамоў, дамогшыся згоды і ўхвалення ўсіх зацікаўленых бакоў на Захадзе і Усходзе. Усе апошнія і будучыя гучныя заявы Лукашэнкі будуць дакладна адпавядаць узгодненай з Масквой лініяй: мы, як і Украіна - незалежныя, мы хочам міру, і мы будзем змагацца за свой суверэнітэт і мір у рэгіёне. Важна! Гэта толькі штучная і ўзгодненая супольная гульня Пуціна і Лукашэнкі, накіраваная на ўступленне ў перамовы. Лукашэнка - інструмент Пуціна.
Сутнасць. Мы неаднаразова раней паведамлялі аб перагаворнай актыўнасці блізкага кола дыктатара на еўрапейска-ўкраінска-амерыканскім кірунку. Для гэтага Алейнік быў зняты з пасады міністра і выведзены ў цень, што дазволіла яму бесперапынна «падарожнічаць» па замежных напрацаваных кантактам і стаць мэсэнджарам дыктатара. З гэтай жа мэтай Пяткевіч была вернутая з ЗША для «адбельвання» Лукашэнкі і арганізацыі наўпроставай міжурадавай сувязі з напрацаванымі за дзесяцігоддзе кантактамі ў ЗША. Кантакты з Украінай ідуць па лініі ГУВ і СБУ.
Аперацыя «Зачос» (наша ўласная жартоўная назва) уступіла ў актыўную фазу са знішчэннем расейскіх беспілотнікаў, што цалкам узгоднена з Масквой. Далей разыгрываецца шызафрэнічнае сяброўства з Расеяй - супрацьстаянне паглынанню. Гучныя заявы Лукашэнкі, вызваленне палітвязняў, тэрміновыя выбары - частка плана.
Мэта аперацыі «Зачос» - укараніць Беларусь і асабіста Лукашэнку ў якасці пасярэдніка на глабальных перамовах. Нашы крыніцы паведамляюць, што гэтая аперацыя ўзгодненая і негалосна адобраная Кітаем.
Вастрыня і напал рыторыкі Лукашэнкі будуць расці на карысць ягонай больш нейтральнай пазіцыі ў дачыненні да вайны.