Швэцыя спыніла супрацоўніцтва з уладамі Грузіі
- 29.10.2024, 11:28
Пастанова была прынятая яшчэ да галасавання.
Ва ўрадзе Швэцыі заявілі, што прыпынілі ўсё наўпроставае супрацоўніцтва з уладамі Грузіі, аднак фінансаванне праектаў грамадскіх арганізацый працягнецца.
Як паведамляе «Еўрапейская праўда», такі каментар міністра замежнага гандлю і міжнароднага супрацоўніцтва развіцця Бенжаміна Дузы прыводзіць Dagens Nyheter.
Міністр сказаў, што Швэцыя спыняе наўпроставае супрацоўніцтва з урадавымі ведамствамі Грузіі і гэтая пастанова была прынятая яшчэ да галасавання 26 кастрычніка праз працяглы дэмакратычны адкат у краіне, напрыклад, прыняцце скандальнага закона аб «замежных агентах».
«Гаворка ідзе, сярод іншага, аб супрацоўніцтве паміж падатковымі органамі, што мы ўважаем за недарэчнасць у цяперашніх абставінах», – адзначыў Бенджамін Дуза.
Ён дадаў, што Стакгольм гатовы аднавіць супрацоўніцтва, калі Грузія зноў зменіць курс - што выглядае малаімаверным, пакуль «Грузінская мара» застаецца ва ўладзе.
«Калі далей высветліцца, што Грузія сур'ёзна ўспрымае свой рух у ЕЗ і цэніць стасункі з Еўразвязам - дзверы Швэцыі адчыненыя», - сказаў міністр.
Агульная швэдская дапамога для Грузіі дасягала 190 млн швэдскіх крон на год. У 2024 годзе 25 млн крон (больш за 2 млн еўраў) пераразмеркавалі для праектаў грамадзянскай супольнасці.
«Гэтыя сродкі накіроўваюцца перш за ўсё на падтрымку грамадзянскай супольнасці фінансавымі рэсурсамі і юрыдычнымі магчымасцямі, каб яны маглі працягваць працаваць, нягледзячы на ўведзеныя заканадаўчыя абмежаванні», - сказаў Бенджамін Дуза.
ЗША пасля выбараў папярэдзілі Грузію аб магчымых наступствах, калі ўрад не зменіць антызаходні курс.
У Еўракамісіі адзначылі, што ЕЗ будзе арыентавацца на фінальны даклад міжнародных наглядальнікаў у сваёй ацэнцы грузінскіх выбараў. У той жа час у заявах асобных краін кіраўнікі МЗС і лідары выказалі занепакоенасць фактамі, якія згадалі назіральнікі ў прамежкавым дакладзе.
Як паведамлялася, апазіцыйныя партыі не прызнаюць вынікі парламенцкіх выбараў, заяўляючы, што «Грузінская мара» іх «скрала». Напярэдадні падчас вялікага пратэсту ў Тбілісі грузінская апазіцыя агучыла патрабаванні, дарэчы, наконт паўторных выбараў.