Эліта ці слабыя салдаты: Якія войскі КНДР выправіла супраць Украіны
- 30.10.2024, 9:09
Эксперт ацаніў сітуацыю.
Задзейнічанне паўночнакарэйскіх вайскоўцаў у вайне супраць Украіны з'яўляецца адназначным фактам. Зрэшты, застаецца адкрытым пытаннем тое, якіх менавіта салдатаў КНДР пастанавіла даць Расеі і ці ёсць сярод іх «элітны» спецназ Кім Чэн Ына.
Пра тое, якія войскі КНДР будуць ваяваць супраць Украіны гаворыцца ў матэрыяле РБК-Украина..
Што вядома пра ўдзел вайскоўцаў КНДР у вайне супраць Украіны
Паводле звестак ГУВ МА, першыя падраздзяленні паўночнакарэйскіх вайскоўцаў, якія прайшлі навучанне на ўсходніх расейскіх палігонах, ужо прыбылі ў зону баявых дзеянняў. Так, 23 кастрычніка іх з'яўленне было зафіксаванае ў Курскай вобласці.
Выведка ацаніла, што колькасць перакінутых у Расею вайскоўцаў КНДР цяпер складае блізу 12 тысячаў чалавек, сярод іх – 500 афіцэраў, у тым ліку тры пхеньянскія генералы.
У гэты панядзелак генеральны сакратар NATO Марк Рутэ пацвердзіў, што Масква сапраўды перадыслакавала паўночнакарэйскіх салдатаў КНДР у Курскую вобласць. Гаворка ідзе пра прысутнасць не менш як 3000 салдатаў, якія распачалі зладжванне на мясцовасці.
У медыя з'явілася таксама паведамленне, што УСУ маглі нанесці першы ўдар па паўночнакарэйскіх вайскоўцаў. Верагодна, артылерыя магла патрапіць па будынку ў Курскай вобласці, дзе яны знаходзіліся. Зрэшты, афіцыйных пацверджанняў гэтаму пакуль няма.
Пры гэтым у заходніх СМІ, а таксама ў заявах прадстаўнікоў Захаду і ў Сеуле гучалі розныя ацэнкі наконт таго, якімі менавіта ваякамі Пхеньян пастанавіў «падзяліцца» з Масквой. Раней у Паўднёвай Выведцы меркавалі, што размова можа ісці пра адпраўку КНДР салдатаў, уключаючы падраздзяленне спецназу.
Выданне The New York Times са спасылкай на інфармаваныя крыніцы пісала, што да 28 кастрычніка ў Курскай вобласці апынуцца 5 тысячаў салдатаў з так званага «элітнага» падраздзялення войска Кім Чэн Ына.
The Wall Street Journal са спасылкай на аналітыкаў наадварот паведаміла, што гаворка ідзе не пра элітныя падраздзяленні. Яны таксама эксплуатуюць састарэлую ваенную тэхніку.
«Вонкава яны маладыя – падлеткі або ім блізу 20 гадоў – і, верагодна, яны на ранніх стадыях набору ў войска, паводле відэаматэрыялаў і прадстаўнікоў выведкі. Ваенныя аналітыкі кажуць, што салдаты даволі нізкага росту і слабога целаскладу, што сведчыць пра распаўсюджванне недаядання ў беднай Паўночнай Карэі», – гаворыцца ў матэрыяле WSJ.
Падобнае меркаванне цяпер падзяляюць і ў выведцы Паўднёвай Карэі. У справаздачы ўстановы, апублікаванай у СМІ, указваецца, што паўночнакарэйскія войскі ў Расеі ў асноўным складаюцца з маладзёнаў ва ўзросце да 20 гадоў, а некаторыя з іх увогуле падлеткі.
«Выведныя звесткі і відэазапісы паказваюць на тое, што сярод салдатаў шмат падлеткаў і маладых людзей, якія, верагодна, знаходзяцца на ранняй стадыі службы. Гэтыя вайскоўцы выглядаюць даволі нізкімі і худымі, што паказвае на праблему недаядання ў Паўночнай Карэі», – гаворыцца ў справаздачы.
Якіх вайскоўцаў Пхеньян пастанавіў даць Маскве
На думку кіраўніка Цэнтра ваенна-прававых даследаванняў Аляксандра Мусіенкі ацэнкі якасці паўночнакарэйскіх салдатаў, накіраваных для ўдзелу ў вайне супраць Украіны, адрозніваюцца таму, што цяпер цяжка сказаць, наколькі гэтыя войскі з'яўляюцца падрыхтаванымі, пакуль яны не пакажуць сябе непасрэдна ў баі.
«Гэта значыць, наколькі яны якасна падрыхтаваныя, матываваныя і як яны будуць сябе паводзіць у баявых дзеяннях – будзе вядома толькі выключна ў баях. Усё астатняе – ацэнка, меркаванне аналізу, якія грунтуюцца на наяўных звестках з медыя і іншых крыніцаў», – адзначыў Мусіенка.
Акрамя таго, эксперт выказаў надзею, што Украіна надалей будзе мець вычарпальны пералік і інфармацыю пра паўночнакарэйскія войскі, іх магчымасці, здольнасці і г.д.
«Таму што мы пайшлі на паглыбленае супрацоўніцтва з Паўднёвай Карэяй. Пра гэта казаў прэзідэнт Уладзімір Зяленскі. Хутка будзе сфармаваная ўкраінская дэлегацыя, якая будзе ў гэтым кірунку працаваць. Таму ў нас будзе больш інфармацыі», – тлумачыць суразмоўца.
Ён падкрэсліў, што ў любым выпадку трэба разумець, што ніхто не недаацэньвае ворага і не пераацэньвае адначасова. Гэта значыць, на сёння Сілы абароны Украіны рыхтуюцца адбіваць атакі сярод іншага паўночнакарэйскіх войскаў.
«І ў прынцыпе мы гэта ўспрымаем як “з'явіўся яшчэ вораг”. Няхай яны паўночнакарэйцы, бураты, тувінцы або дагестанцы. Усё роўна. І ў любым выпадку, выключна з ваеннага гледзішча, гэта ўспрымаецца як нарошчванне кантынгенту ворага. Не гледзячы – гэта паўночнакарэйцы ці расейцы. У прынцыпе, для нас гэта прагназавана», – кажа Мусіенка.
Паводле ягоных словаў, відавочна, што Расея будзе спрабаваць выцясняць украінскія войскі з Курскай вобласці. Эксперт нагадаў, што вораг ужо распачаў сама меней дзве спробы маштабных контратак, паводле вынікаў якіх мае частковыя поспехі.
«Але і нашым сілам удалося крыху стабілізаваць сітуацыю і нават аднавіць пэўныя страчаныя пазіцыі. Ну, і таму зразумела, што РФ, якая вядзе наступальныя дзеянні і не мае значнай колькасці ўнутраных рэзерваў на сваёй тэрыторыі, таму што яны ўсё ўведзеныя ў баі, вядома, што для яе нават 3-4-5 тысячаў вайскоўцаў – гэта цяпер сіла, на якую яны ўскладаюць пэўныя разлікі», – падсумаваў Мусіенка.