General Motors паказалі незвычайны беспілотны аўтадом прэміум-класу

• 30.10.2024, 9:37

Стырна ці педаляў у Cadillac OpenSpace няма.

У падраздзяленні General Motors Design распрацавалі канцэпт Cadillac OpenSpace. Шыкоўны дом на колах з'яўляецца цалкам аўтаномным, бо перасоўваецца на аўтапілоце. Пра яго расказалі на старонцы падраздзялення ў Instagram.

Новы Cadillac OpenSpace памерамі можна параўнаць з аўтобусам. У яго вялікая плошча шклення, а на даху размясцілі раскладную тэрасу з тэнтам.

У салоне дызайнерская мэбля, малюнак зорнага неба на столі і нават сапраўдны камін. У аздабленні выкарыстоўвалі скуру, дрэва і мармур.

Інтэр'ер выканалі паводле прынцыпу студыі, гэта значыць, асобных пакояў тут няма. Унутры ёсць двухспальныя ложкі, канапа-трансформер і кухня ў стылі хай-тэх. Клімат-кантроль і нават душ маюць сэнсарнае кіраванне.

Акрамя таго, прадугледжаныя магчымасці персаналізацыі салона, можна лёгка змяніць яго кампаноўку ці ўнутранае аздабленне.

Стырна або педаляў у Cadillac OpenSpace няма, бо аўтапілот 5 узроўня не патрабуе ручнога кіравання ўвогуле. Замест кіроўцы – персанальны асістэнт, які будзе планаваць маршрут або заказваць ежу.