Прэм'ер-міністр Лібана: Спыненне агню можа быць дасягнутае праз некалькі дзён ці нават гадзін

• 31.10.2024, 10:40

Названая галоўная ўмова з пункту гледжання Бейрута.

Прэм'ер-міністр пераходнага ўрада Лібана Наджыб Мікаці заявіў у інтэрв'ю лібанскаму тэлеканалу Al Jadeed, што ён спадзяецца «з належнай асцярожнасцю» на тое, што спыненне агню з Ізраілем будзе дасягнутае «цягам некалькіх дзён ці нават гадзін».

Заява прагучала ўвечары ў сераду, 30 кастрычніка, пасля размовы Мікаці з амерыканскім спецпасланнікам Амосам Хохштэйнам, пішуць «Детали».

Са слоў Мікаці, яго краіна «гарантуе выкананне рэзалюцыі 1701 - без якіх-небудзь дадаткаў, і лібанскае войска будзе паступова прасоўвацца проста на поўдзень». Ён заявіў, што, з пункту гледжання Бейрута, першая ўмова захавання рэжыму спынення агню - «уваход ліюанскага войска і яго размяшчэнне, а таксама вывад ізраільскіх войск».

Характэрна, што ў заяве лібанскага прэм'ер-міністра не згадвалася ніякай сувязі паміж тым, што адбываецца ў Лібане, і дзеяннямі ЦАХАЛ у сектары Газа. Больш за тое, Мікаці заявіў, што «Хезбала» павінна была «разарваць сувязь паміж сектарам Газа і лібанскім фронтам» на больш раннім этапе.

Неўзабаве быў апублікаваны і праект пагаднення аб спыненні агню. Пра гэта распавялі аглядальнікі сайта «ХаАрэц» Ёнатан Ліс і Амір Цівон, не паказваючы свае крыніцы. Сутнасць дамовы ў тым, што ЦАХАЛ выйдзе з Лібана цягам тыдня, але Ізраіль і пасля гэтага захавае права дзейнічаць не тэрыторыі Лібана супраць «Хезбалы».

Згодна са схемай, складзенай ЗША і перададзенай Ізраілю, апошні зможа дзейнічаць супраць пагроз на яго адрас уздоўж лініі мяжы, а таксама ў глыбіні Лібана, калі лібанскі ўрад не зможа самастойна нейтралізаваць гэтыя пагрозы.

Да ліку пагроз з боку «Хезбалы» належыць вытворчасць зброі (зброевыя заводы «Хезбалы» павінны быць знішчаны), транспартаванне цяжкага ўзбраення, балістычных ракет або ракет вялікай далёкасці. Пры гэтым дазвол дзейнічаць Ізраілю будзе дадзены толькі ў тым выпадку, калі ўрад Лібана ці іншы рэлевантны кантрольны орган, створаны пад эгідай ЗША, пацярпіць няўдачу ў сваіх спробах гэтаму перашкодзіць; Ізраілю будуць дазволеныя выведвальныя палёты над Лібанам.

Лібанскае войска будзе адзінай сілай, якой будзе дазволена дзейнічаць паблізу мяжы. На яе будзе ўскладзенае спыненне кантрабанды зброі і ліквідацыя яе незаконнай вытворчасці. «Ізраіль будзе мець права абараняць сябе ў адпаведнасці з міжнародным правам і падтрымліваць бяспеку ўздоўж паўночнай мяжы, у тым ліку ўжываць захады супраць пагроз», гаворыцца ў дакуменце. Таксама вызначаная тэрыторыя, на якой Ізраіль зможа дзейнічаць «у парадку самаабароны».

У праекце не вызначаная дата ўваходжання рэжыму спынення агню ў дзеянне, аднак з моманту абвяшчэння будзе вызначаны тэрмін 60 дзён для поўнай рэалізацыі пагаднення. Ізраіль і Лібан створаць супольны механізм па наглядзе за выкананнем артыкулаў пагаднення. У праекце таксама гаворыцца, што Ізраіль і ЗША будуць абменьвацца канфідэнцыйнай выведвальнай інфармацыяй аб парушэннях або меркаваных парушэннях пагаднення з лібанскага боку. Інфармацыя будзе перададзеная ўраду Лібана або альтэрнатыўнаму механізму нагляду, каб яны маглі ўжыць захады супраць парушэнняў.

Ці той гэта праект дамовы, аб якім казаў прэм'ер-міністр Наджыб Мікаці тэлеканалу Al Jadeed? На гэтае пытанне ў Белым доме адказалі, што ў СМІ зараз «цыркулюе мноства праектаў», але яны «не адлюстроўваюць існы стан перамоў». Магчыма, сітуацыя высветліцца ў чацвер, 31 кастрычніка, калі ў Ізраіль прыбудуць пасланнікі прэзідэнта ЗША Джо Байдэна ў рэгіёне Амас Хохштэйн і Брэт Макгерк.

Высокапастаўленыя ізраільскія чыноўнікі скептычна ставяцца да магчымасці дасягнуць пагаднення аб спыненні агню да выбараў у ЗША. Амерыканцы ж не вельмі вераць у тое, што «Хезбала» пагодзіцца разарваць сувязь паміж Лібанам і сектарам Газа.