Малдова выбрала ЕЗ

• 31.10.2024, 18:40

Канстытуцыйны суд замацаваў вынікі рэферэндуму.

Канстытуцыйны суд Малдовы на пасяджэнні ў чацвер, 31 кастрычніка, прызнаў законнымі вынікі рэферэндуму аб еўрапейскай інтэграцыі, дзе з мінімальнай перавагай перамаглі прыхільнікі ўступлення ў ЕЗ.

Пра гэта паведамляе «Еўрапейская праўда».

Пачатак пасяджэння Канстытуцыйнага суда Малдовы адбыўся на фоне пратэсту, арганізаванага лідарамі і прыхільнікамі прарасейскага блоку «Перамога», звязанага з беглым алігархам Іланам Шорам, а таксама Партыі камуністаў Малдовы.

У выніку пастановы суда ў Канстытуцыю Малдовы будзе ўнесенае палажэнне, што ўступленне Малдовы ў Еўрапейскі Звяз становіцца незваротнай мэтай.

Дадаткова Канстытуцыйны суд Малдовы абвясціў, што разгледзіць запыт камуністаў аб пераліку галасоў на рэферэндуме ў кантэксце звароту Цэнтральнай выбарчай камісіі аб пацвярджэнні вынікаў плебісцыту, аднак адхіліў заяву аб прызнанні камуністаў бокам у справе.

Нагадаем, за канстытуцыйныя змены ў еўраінтэграцыі Малдовы на рэферэндуме 20 кастрычніка прагаласавалі 50,35% выбарнікаў, супраць – 49,65%. Розніца склала ўсяго 10 тысячаў галасоў, прычым перавагу прыхільнікаў еўраінтэграцыі забяспечыла найперш дыяспара.