Жонка Трампа не згодна з ключавым пунктам яго перадвыбарнай праграмы

• 4.10.2024, 12:26

Да гэтага Меланія Трамп рэдка выказвала свае палітычныя погляды публічна.

Жонка Дональда Трампа Меланія разышлася з ім у поглядах на адзін з ключавых пунктаў перадвыбарнай праграмы - стаўленне да абортаў. У сваіх мемуарах яна заявіла, што падтрымлівае права жанчыны кантраляваць сваё цела, у тым ліку права на аборт, піша выданне The Guardian, якое атрымала эксклюзіўны доступ да кнігі.

"Неабходна гарантаваць, што жанчыны будуць мець аўтаномію ў выбары сваіх пераваг наконт нараджэння дзяцей, на аснове ўласных перакананняў, без якога-небудзь умяшання або ціску з боку ўрада", - заяўляе Меланія Трамп, падкрэсліваючы, што права жанчыны на індывідуальную свабоду і сваё ўласнае жыццё "дае ёй права перапыніць цяжарнасць, калі яна таго пажадае".

“Абмежаванне права жанчыны выбіраць, ці перарываць непажаданую цяжарнасць, раўназначнае пазбаўленню яе кантролю над уласным целам. Я пранесла гэта перакананне з сабой праз усё сваё дарослае жыццё” - падкрэсліла яна.

Меланія Трамп рэдка выказвала свае палітычныя погляды публічна, аднак яе будучая кніга дэманструе погляды, якія рашуча не ўпісваюцца ў агульную палітыку рэспубліканскай партыі, зазначае The Guardian.

Пры гэтым кампанія Трампа пакуль не дала ніякіх каментароў наконт гэтага.