Стала вядомае дакладнае месца народзінаў дзеда Уэйна Грэцкі

• 5.10.2024, 18:24

Гэта не Гарадзенская вобласць, як меркавалася раней.

Дзед нападніка НХЛ Уэйна Грэцкі быў выхадцам з вёскі Агдэмер былога Кобрынскага павета Гарадзенскай губерні, піша Tochka.by.

Паводле інфармацыі крыніцы з архіўных дакументаў, Цярэнцій Лаўрэнцьевіч Грэцкі нарадзіўся 10 красавіка 1892 года (паводле старога стылю).

Сёння ягоны населены пункт знаходзіцца ў Драгічынскім раёне Берасцейскай вобласці. Гэта Палессе.

Гэты запіс быў знойдзены ў метрычнай кнізе Гутаўскай царквы Кобрынскага павета Гарадзенскай губерні за 1892 год.

Дзед легендарнага хакеіста нарадзіўся ў сям'і Лаўрэнція Сямёнавіча і Настассі Іванаўны Грэцкіх. У пачатку XX стагоддзя Цярэнцій Лаўрэнцьевіч Грэцкі пераехаў у Канаду праз Чыкага. Ён эміграваў разам з жонкай Ганнай і сынам Зіновіем. У новым заакіянскім жыцці дзед Уэйна пачаў насіць імя Тоні.

Неўзабаве ён развёўся з жонкай і пазнаёміўся з Марыяй з Цярнопальскай вобласці Украіны. У іх нарадзіўся сын Уолтар, які стаў бацькам будучай легенды НХЛ.

Уолтар і Цярэнцій (Тоні) Грэцкі ўсяляк падтрымлівалі захапленне юнага Уэйна і ягоны запал да хакею. З тых часоў спартовец зрабіў бліскучую кар'еру, выступаючы за «Эдмантан», «Лос-Анджэлес Кінгз», «Сэнт-Луіс» і «Рэйнджэрс» у НХЛ.

Уэйн Грэцкі гуляў у НХЛ з 1978 да 1999 года. За 21 год кар'еры ён устанавіў 61 рэкорд лігі.

Найважнейшым дасягненнем з'яўляецца найбольшая колькасць галоў: 894 у 1487 гульнях.

У 2010 годзе Грэцкі наведаў Менск, прыбыўшы на матч зорак КХЛ у 2010 годзе. Тады яму арганізавалі сустрэчу з сястрой Галінай Салдаценкавай.