Пастаўкі індыйскіх набояў для Украіны могуць быць сарваныя

• 9.10.2024, 16:37

Праз выцек інфармацыі.

Канал паставак індыйскіх набояў для Украіны можа неўзабаве закрыцца ў выніку публікацыі інфармацыі аб адпаведных кантрактах.

Пра гэта Charter97.org распавялі інфармаваныя крыніцы.

«Украінская кампанія «Спецтэхнаэкспарт», якая паспяхова пастаўляла дзясяткі тысяч такіх боепрыпасаў, можа страціць вельмі важных замежных партнёраў і наладжаны канал. На рынку кажуць аб палітычным фактары: прэм'ер-міністр Індыі Нарэндра Модзі аддае перавагу захоўваць нейтральнае пазіцыянаванне. Не выключана, што зліў у прэсу кантрактаў мог быць справай рук Галоўнай управы выведкі Генштаба РФ, якая якраз займаецца такімі пытаннямі», - сказаў суразмоўца.

19 верасня агенцтва Reuters паведамляла аб тым, што Кіеў атрымлівае індыйскія боепрыпасы праз еўрапейскія краіны, напрыклад, Чэхію і Італію. Праз Гішпанію і Славенію ва Украіну, магчыма, трапляюць індыйскія кампаненты для вытворчасці боепрыпасаў.

Паводле інфармацыі агенцтва, Масква двойчы спрабавала ўгаварыць Нью-Дэлі спыніць гэтыя пастаўкі. Зрэшты, кіраўнік расейскага МЗС Сяргей Лаўроў гаварыў аб гэтым з міністрам замежных спраў Індыі. Але намаганні Крамля былі праігнараваныя.

3 кастрычніка выданне «Украінская праўда» апублікавала матэрыял, у якім змяшчалася інфармацыя аб кантрактах, звязаных з пастаўкамі набояў індыйскай вытворчасці. Зрэшты, была абнародаваная назва кампаніі-пасярэдніка, якая павінна была ажыццявіць пастаўкі мінамётных стрэлаў, але нібыта дагэтуль іх не зрабіла.

Пасля публікацыі гэтай інфармацыі, кіраўнік украінскай кампаніі «Спецтэхнаэкспарт» Аляксей Пятроў звярнуўся ў Службу бяспекі Украіны з заявай аб злачынстве.