Reuters: Іран баіцца Трампа

• 1.11.2024, 21:33

Ягонае вяртанне да ўлады можа прывесці да вялікіх праблемаў для Тэгерана.

Іран і ягоныя хаўруснікі рыхтуюцца да таго, што яны ўважаюць за жахлівае наступства найбліжэйшых прэзідэнцкіх выбараў у ЗША – вяртанне Дональда Трампа да ўлады. Пра гэта ў пятніцу, 1 лістапада, паведамляе Reuters.

Адзначаецца, што іранскія лідары і іх рэгіянальныя хаўруснікі ў Ліване, Іраку і Емене занепакоеныя, што Трамп можа перамагчы 5 лістапада, і гэта можа выклікаць для іх яшчэ больш праблемаў.

Асноўнай турботай Ірана з'яўляецца верагоднасць таго, што Трамп дасць «зялёнае святло» ізраільскаму прэм'ер-міністру Беньяміну Нетаньяху для ўдараў па ядзерных аб'ектах Ірана.

Таксама на Блізкім Усходзе асцерагаюцца, што Трамп адновіць сваю палітыку «максімальнага ціску» шляхам узмацнення санкцый на нафтавую галіну і нацэліцца на ліквідацыю лідараў тэрарыстычных груповак.

Іранскія, арабскія і заходнія чыноўнікі прагназуюць, што Трамп будзе чыніць ціск на вярхоўнага лідара Ірана аяталу Алі Хаменеі, прымушаючы яго пагадзіцца на пагадненне аб ядзерным стрымліванні на ўмовах, якія ўсталюе ён сам і Ізраіль.

«Такія патэнцыйныя дзеянні могуць мець далёкія наступствы для балансу сілаў на Блізкім Усходзе і могуць змяніць знешнюю палітыку Ірана і ягоныя эканамічныя перспектывы», – адзначае Reuters.