У Беларусі ўвялі чарговую падатковую навіну

• 10.11.2024, 16:58

Што і для каго змянілася?

У Беларусі ўвялі падатковыя змены, якія закранаюць насельніцтва. Так, заяву на некаторыя паслугі цяпер аформяць самі падаткавікі, піша «Люстэрка».

«Цяпер пры асабістым звароце грамадзянаў у падатковы орган заявы на ажыццяўленне асобных адміністрацыйных працэдураў аформіць супрацоўнік падатковага органа, у які фізічная асоба звярнулася», – паведамляе Міністэрства падаткаў і збораў (МПЗ).

Ва ўстанове ўдакладнілі, што размова ў тым ліку пра такія адміністрацыйныя паслугі:

• залік, вяртанне сумаў падаткаў, збораў (мытаў), пеняў;

• выдача даведкі пра выплату падаходнага падатку з фізічных асобаў, зямельнага падатку і падатку на нерухомасць у дачыненні да адчужальнага аб'екта нерухомай маёмасці (адчужэнне – гэта перадача правоў уласнасці. – Заўвага. рэд.);

• выдача даведкі пра сталае знаходжанне чалавека ў Беларусі (гэта трэба для таго, каб унікнуць падвойнага падаткаабкладання з іншымі краінамі);

• выдача выпіскі пра налічаныя і выплачаныя падаткі, зборы (мыты), пені.

У МПЗ прывялі прыклад. Дапусцім, чалавеку трэба атрымаць выпіску пра выстаўленыя і выплачаныя зборы. Яму трэба прыйсці ў любую падатковую ў Беларусі (не залежыць ад ягонай рэгістрацыі ці месца жыхарства), паказаць дакумент, які сведчыць асобу.

Супрацоўнік падатковай сам аформіць такую заяву, прапануе яе падпісаць асобе, якая звярнулася, а потым пусціць у далейшую працу.

«У выпадку, калі для ажыццяўлення адміністрацыйнай працэдуры (напрыклад, вяртанне дзяржаўнай мыты) фізічнай асобе неабходна прыкласці якія-небудзь дакументы, яны таксама перадаюцца супрацоўніку падатковага органа, які ўнясе неабходную інфармацыю ў заяву і надалей прымацуе дакументы да заявы, якую падпісала фізічная асоба», – удакладняюць у МПЗ.