У Польшчы затрымалі беларуса, які мог працаваць на расейскія спецслужбы

• 13.11.2024, 21:31

Яму пагражае пажыццёвае зняволенне.

Агенцтва ўнутранай бяспекі Польшчы (ABW) затрымала беларуса паводле падазрэння ў спробе падпалу ў Гданьску. Як высветліла следства, злачынная група, у якую ён уваходзіў, дзейнічала на замову замежнай выведкі. Паводле гэтай справы праходзяць і іншыя грамадзяне Беларусі.

Як паведаміла ABW, падазраванага затрымалі 6 лістапада ў Варшаве. Падчас следчых дзеянняў у яго знайшлі і канфіскавалі прадметы, якія маглі быць скарыстаныя ў падобных дыверсіях. Мужчыну ўзялі пад варту.

Затрыманне беларуса з'яўляецца часткай справы аб падпалах, якія, як мяркуецца, расейскія спецслужбы арганізавалі ў Гданьску, Гдыні і ў Марках пад Варшавай, а таксама спрабавалі арганізаваць ва Уроцлаве.