Кіраўнік МЗС Польшчы анансаваў найважнейшыя перамовы пра вайну ва Украіне

• 16.11.2024, 14:05

Сустрэча пройдзе ў Варшаве.

У Варшаве на наступным тыдні пройдуць перамовы пра вайну РФ супраць Украіны. Польшча анансавала сустрэчу ў фармаце «Веймарскі трыкутнік+».

Пра гэта паведаміў міністр замежных справаў Польшчы Радаслаў Сікорскі, якога цытуе RMF24.

Як адзначыў кіраўнік МЗС Польшчы, сустрэча ў фармаце «Веймарскі трыкутнік+» адбудзецца ў аўторак, 19 лістапада.

Ён удакладніў, што акрамя кіраўнікоў МЗС Францыі, Польшчы і Нямеччыны чакаецца сустрэча прадстаўнікоў іншых важных еўрапейскіх краінаў. Таксама былі запрошаныя міністр замежных справаў Украіны Андрэй Сібіга і новая галоўная дыпламатка ЕЗ Кая Калас.

«Як бачым, найважнейшыя перамовы пра гэты крызіс пройдуць у Варшаве», – сказаў Сікорскі.