«Прэзідэнт» Абхазіі заявіў пра гатоўнасць пайсці ў адстаўку

• 16.11.2024, 14:40

Але агучыў умовы.

«Прэзідэнт» самаабвешчанай «рэспублікі» Абхазія Аслан Бжанія сустрэўся з прыхільнікамі ў сваім родным сяле Тамыш, паведамляе агенцтва «Апсныпрэс».

Бжанія заявіў, што гатовы абвясціць «выбары» ў «рэспубліцы» і падаць у адстаўку, калі пратэстоўцы пакінуць адміністрацыю «прэзідэнта» ў Сухуме. Яны прарваліся да ўрадавых будынкаў у сталіцы напярэдадні.

Бжанія дадаў, што мае намер удзельнічаць у «выбарах» у выпадку датэрміновай адстаўкі. Часовым выканаўцам абавязкаў «кіраўніка» Абхазіі на гэты час стане «віцэ-прэзідэнт» Бадра Гунба.

Прадстаўнікі апазіцыі пры гэтым не пагадзіліся з кандыдатурай Гунбы, бо «гэта ўсё ж такі чалец каманды Бжанія». Яны прапанавалі, каб «выканаўцам абавязкаў прэзідэнта» стаў «спікер парламента» Лаша Ашуба альбо кампрамісная фігура, якая задаволіла б усе бакі.

Апроч сыходу Бжанія, пратэстоўцы запатрабавалі адмовы ўладаў ад пагаднення з Расеяй, якое дае права расейскім кампаніям рэалізоўваць інвестыцыйныя праекты на тэрыторыі Абхазіі.

Апазіцыя стварыла кардынацыйную раду, яе прадстаўнікі цяпер праводзяць паседжанне ў адміністрацыі «прэзідэнта» ў Сухуме, паведамляе тэлеграм-канал Respublica. Каля будынка збіраюцца пратэстоўцы.