WP: Пуцін прамахнуўся з планамі датычна Курскай вобласці
- 16.11.2024, 15:23
Гатоўнасць Крамля да перамоваў вызначыць адзін чыннік.
Украінскія сілы цяпер сутыкаюцца з жорсткім контрнаступам расейскага войска ў Курску, паколькі расейскі дыктатар Уладзімір Пуцін імкнецца забяспечыць кантроль над тэрыторыяй перад магчымымі перамовамі. Аднак амбіцыйныя планы Пуціна хуткага «вызвалення» Куршчыны церпяць крах, як гэта было з ягонымі заявамі пра акупацыю Кіева за тры дні ў 2022 годзе.
Пра гэта паведамляе The Washington Post. Так, на мінулым тыдні Расея пачала новы контрнаступ, кінуўшы на лінію фронту тысячы навабранцаў. Амерыканская выведка ацэньвае, што ў рэгіён было перакінута не менш за 10000 паўночнакарэйскіх салдатаў.
Новы наступ быў хаатычны, але бязлітасны, і пачаўся неўзабаве пасля абрання Дональда Трампа, які абяцаў хуткае заканчэнне вайны, прэзідэнтам ЗША.
Гэтыя дзеянні сведчаць, што Крэмль усё больш усведамляе значэнне Курска ў будучых перамовах. Калі такія перамовы адбудуцца, Расея імкнецца стварыць сітуацыю, у якой для дэбатаў будуць вынесеныя толькі ўкраінскія тэрыторыі.
Расейскі ваенны блогер і прапагандыст Міхаіл Звінчук, выказаў здагадку, што Трамп можа паспрабаваць чыніць ціск на Маскву праз кантроль Украіны над Курскам. Аднак, паводле ягонага прагнозу, Расея паспрабуе аднавіць кантроль над рэгіёнам у найбліжэйшыя тыдні ці месяцы.
«Я мяркую, што ў любым выпадку пытанне Курска будзе вызначанае да інаўгурацыі Трампа», – сказаў ён.
Паводле словаў Пасі Паройнена, аналітыка групы Black Bird Group з Хельсінкі, якая спецыялізуецца на аналізе адкрытых выведных звестак, украінскія войскі захапілі ад 386 да 579 квадратных міляў за першыя два тыдні Курскай аперацыі ў жніўні. Аднак Расея ўвесь час контратакавала, і, беручы да ўвагі цяперашнія наступы па трох кірунках, Паройнен прагназуе, што ў найбліжэйшыя дні ўкраінскія тэрыторыі могуць скараціцца яшчэ больш.
Аднак апошняя хваля расейскага контрнаступу сутыкнулася з сур'ёзнымі цяжкасцямі. Пасля больш чым тыдня бязлітасных баёў расейскія сілы дамагліся толькі мінімальных поспехаў, несучы значныя страты ў тэхніцы і жывой сіле. Украінскія вайскоўцы адзначаюць, што, нягледзячы на рост ціску, яны ў асноўным утрымліваюць свае пазіцыі.
Арцём Яфанаў, аператар дрона 82-й брыгады, падчас відэасувязі з бліндажа ў Курску расказаў, што бачыў, як расейскія войскі загразлі ў балотах, рэках і балоцістай мясцовасці, што значна ўскладніла іх прасоўванне.
«Мы трымаем межы. Стала складаней, але ў нас ёсць сродкі», – сказаў Яфанаў.
Паводле ягоных словаў, апошні расейскі наступ, верагодна, не столькі звязаны з абраннем Трампа, а больш адлюстроўвае «палітычныя амбіцыі Пуціна прадэманстраваць, што Расея здольная справіцца з задачай і вызваліць Курскую вобласць за тры дні», падобна да таго, як раней расейцы планавалі акупаваць Кіеў.
Любое прасоўванне ў кірунку перамоваў будзе ў значнай ступені залежаць ад таго, ці надумае Пуцін прыняць умовы, прапанаваныя Трампам, ці зробіць выснову, што Трамп мае намер адмовіцца ад падтрымкі Украіны, і таму пастановіць прадаўжаць наступ.
«Ці захоча Пуцін узяць свае фішкі і прыняць больш ці менш прапановаў Трампа, ці ён прыйдзе да высновы, што Трамп збіраецца кінуць Украіну, так што давайце прадаўжаць», – сказаў Жэрар Аро, былы амбасадар Францыі ў Вашынгтоне.
Роб Лі, старэйшы навуковы супрацоўнік Даследчага інстытута знешняй палітыкі ў Філадэльфіі, адзначыў, што Украіна, верагодна, разглядае Курск як патэнцыйны вагар у будучых перамовах. Аднак аперацыя значна знясіліла ўкраінскіх вайскоўцаў, а страты, асабліва ва ўсходняй частцы Данецкай вобласці, прыкметныя яшчэ летам, значна выраслі з сярэдзіны жніўня да сярэдзіны верасня. Гэта адбылося таму, што дасведчаныя падраздзяленні пакінулі свае пазіцыі, засяродзіўшыся на Курскай аперацыі.
Лі таксама адзначыў, што за апошнія тры месяцы расейскія сілы рухаліся хутчэй, чым калі-небудзь з 2022 года.
З надыходам зімы ўмовы на полі бою становяцца больш складанымі. Лісце радзее, ускладняючы маскаванне, а замярзанне балоцістай мясцовасці можа змяніць дынаміку баявых дзеянняў. Украіне давядзецца вызначаць, як эфектыўна размеркаваць свае абмежаваныя рэсурсы – войскі і зброю, перасцерагае Лі.
«Куды пасылаць падмацаванне? Таму што калі вы засяродзіцеся на ўтрыманні Курска, гэта можа паставіць пад большую рызыку іншыя адрэзкі фронту», – сказаў ён.