Business Insider: Рутэ хоча згуртаваць NATO і ЗША, перадаючы Еўропе пасланні Трампа

• 16.11.2024, 16:27

Генеральны сакратар NATO ўважае, што Еўропе і ЗША трэба аб'яднацца мацней, чым калі-небудзь дагэтуль.

Скептыцызм новага прэзідэнта ЗША Дональда Трампа да NATO можа стаць перашкодай на шляху да супрацьдзеяння расейскай агрэсіі. Тым не менш у генсака NATO Марка Рутэ ўжо ёсць дакладнае пасланне для рэспубліканца, якое дазволіць палепшыць дачыненні паміж бакамі.

У выданні заявілі, што прызначэнне Рутэ кіраўніком NATO ў пачатку 2024 года дало надзею на паляпшэнне дачыненняў паміж Альянсам і ЗША.

Са слоў аналітыкаў, Рутэ разумее, што Еўропе трэба больш выдаткоўваць на абарону.

Польшча другі год запар лідзіруе ў NATO па расходах на абарону ў працэнтах ад ВУП, падкрэслілі ў выданні. У 2024 годзе краіна выдзеліла на абарону больш за 4% сваёй эканамічнай вытворчасці.

- Гэта ясны сігнал не толькі нашым апанентам, але і ЗША. Еўропа разумее, што павінна рабіць больш для забеспячэння нашай агульнай бяспекі. І гэта пачынаецца з павелічэння выдаткаў і нарошчвання патэнцыялу.

Аналітыкі ўважаюць, што словы генсака NATO з'яўляюцца адказам на пагрозы Трампа падчас свайго першага тэрміну ў Белым доме вывесці ЗША з Альянсу, калі саюзнікі не пачнуць траціць больш сродкаў на абарону, адзначылі ў выданні.

Акрамя таго, падчас візіту ў Парыж для сустрэчы з прэзідэнтам Францыі Эманюэлем Макронам Рутэ згадаў вайну ва Украіне.

- Расея, працуючы разам з Паўночнай Карэяй, Іранам і Кітаем, пагражае не толькі Еўропе, яна пагражае міру і бяспецы, так, тут, у Еўропе, але таксама ў Інда-Ціхаакіянскім рэгіёне і ў Паўночнай Амерыцы. Таму мы павінны згуртавацца - Еўропа, Паўночная Амерыка і нашы глабальныя партнёры, каб гарантаваць бяспеку і працвітанне нашых народаў.