Джо Байдэн сустрэўся з Сі Цзіньпінам
- 17.11.2024, 12:45
Размова доўжылася блізу дзвюх гадзін.
Прэзідэнт ЗША Джо Байдэн і старшыня КНР Сі Цзіньпін сустрэліся на палях саміту АТЭС (Азіяцка-Ціхаатлантычнае эканамічнае супрацоўніцтва), які праходзіць у Перу. Гэта іх трэцяя асабістая сустрэча за час прэзідэнцкага тэрміна Байдэна.
Як паведамляе ВВС, яны падвялі вынік дачыненняў дзвюх краін за чатыры гады прэзідэнцкага тэрміна Байдэна. Размова доўжылася блізу дзвюх гадзін.
Абодва лідары выкарыстоўвалі сустрэчу для падвядзення вынікаў дачыненняў дзвюх краін за гэтыя гады ў самых розных сферах: ад ролі штучнага інтэлекту ў ядзернай сферы да барацьбы з наркатрафікам і дапамогі расейскаму АПК у вайне супраць Украіны.
Сі Цзіньпін заявіў, што Пекін гатовы працаваць з новай амерыканскай адміністрацыяй Дональда Трампа, які неўзабаве зменіць Байдэна (да канца яго паўнамоцтваў засталося два месяцы). Нягледзячы на тое, што абраны прэзідэнт ужо анансаваў новую гандлёвую вайну з Кітаем і абраў кіраўніком сваёй дыпламатыі відавочнага «ястраба».
Старшыня КНР заявіў, што разлічвае на «паступовы транзіт» у кантактах з Вашынгтонам пасля таго, як прэзідэнтам ЗША зноў стане Дональд Трамп.
Паводле слоў Сі Цзіньпіня, мэтай Кітая на наступныя чатыры гады застаюцца «стабільныя і здаровыя стасункі Кітая і ЗША», якія за Байдэнам «перажывалі ўзлёты і падзенні». На што Байдэн адказаў, што ён «ганарыцца прагрэсам, які мы дасягнулі за гэты час».
- Калі дзве краіны будуць ставіцца адна да адной як да партнёра і сябра, шукаць пункты судакранання, нашы стасункі дасягнуць значнага прагрэсу, - цытуе агенцтва Reuters заяву Сі Цзіньпіна на сустрэчы з Байдэнам. — Але калі мы будзем успрымаць адзін аднаго як супраціўнікаў ці ворагаў, весці жорсткую канкурэнтную барацьбу і імкнуцца нашкодзіць адзін аднаму, мы сапсуём стасункі ці нават адкінем іх назад.
Байдэн, паводле афіцыйнага рэлізу Белага дома, выказаў заклапочанасць тым, што Кітай працягвае падтрымліваць расейскі АПК. У адказ Сі Цзіньпін нагадаў, што Пекін з'яўляецца прыхільнікам мірнага ўрэгулявання канфлікту Расеі і Украіны і выступае правадніком «чоўнавай дыпламатыі».