Страты РФ у вайне супраць Украіны паставілі новы рэкорд

• 18.11.2024, 21:33

Звесткі выведкі Вялікай Брытаніі.

У кастрычніку сярэднядзённыя страты расейскіх войскаў у вайне ва Украіне дасягнулі новага максімуму і маюць тэндэнцыю да далейшага росту.

Пра гэта паведамляе Міністэрства абароны Брытаніі ў сацсетцы X.

Паводле справаздачы Генштаба УСУ, сярэднядзённыя страты расейцаў у кастрычніку склалі 1354 чалавекі – гэта самы высокі паказнік з пачатку вайны. Гэтая колькасць ахоплівае як загінулых, так і параненых акупантаў.

Як адзначаюць вайсковыя аналітыкі, за першыя 12 дзён лістапада страты расейскіх войскаў заставаліся на высокім узроўні, з сярэднядзённым паказнікам 1498 чалавек. Гэта сведчыць, што тэндэнцыя росту стратаў расейскіх войскаў верагодна прадоўжыцца.

У выведцы Брытаніі адзначылі, што ў кастрычніку Расея таксама панесла найбольшыя месячныя страты за ўвесь перыяд вайны – 41980 чалавек. Гэты лік значна перавышае папярэдні рэкорд 39110 чалавек, зафіксаваны ў траўні 2024 года.

Паводле апошніх падлікаў, з пачатку вайны Расея, верагодна, страціла больш за 700 тысячаў чалавек.

Таксама брытанская выведка звярнула ўвагу на тое, што Расея павялічыла тэмпы наступальных аперацый, сярод іншага: у раёнах Курска, на ўсходзе ракі Аскол, каля Тарэцка, Пакроўска і Вуглядара.

Чакаецца, што гэтыя наступальныя дзеянні будуць прадаўжацца і цягам зімовага перыяду, з высокай верагоднасцю Расея будзе несці яшчэ большыя страты.