У Ізраілі затрымалі памочніка Нетаньяху

• 2.11.2024, 12:42

Паводле падазрэння ў выцечцы выведных звестак пра ХАМАС.

Памочнік прэм'ер-міністра Ізраіля Біньяміна Нетаньяху ўваходзіць у лік людзей, арыштаваных паводле падазрэння ў парушэнні бяспекі, якое прывяло да выцечкі зусім сакрэтных выведных звестак, паведамляе выданне Axios.

Паводле звестак журналістаў, цягам некалькіх дзён інфармацыя пра інцыдэнт знаходзілася пад забаронай, пакуль у пятніцу, 1 лістапада, суд не апублікаваў некаторыя падрабязнасці.

Ізраільскія афіцыйныя асобы заявілі, што некалькі тыдняў таму Войска абароны Ізраілю (ЦАХАЛ) звярнулася ў Шын-Бэт – службу ўнутранай выведкі Ізраіля – з просьбай пачаць расследаванне таго, як цалкам сакрэтная неапрацаваная справаздача выведкі трапіла да супрацоўнікаў нямецкага таблоіда Bild.

У пачатку верасня 2024 года гэтае выданне апублікавала матэрыял, у якім згадваўся дакумент, як мяркуецца, падрыхтаваны лідарам ХАМАС Ях'ям Сінварам, што змяшчае стратэгію ХАМАС у дачыненні да перамоваў пра ізраільскіх закладнікаў і спыненне агню.

Супольнае расследаванне Шын-Бэт, ізраільскай паліцыі і ЦАХАЛ прывяло да арышту некалькіх падазраваных.

Расследаванне было прысвечанае «праблеме парушэння бяспекі праз незаконнае прадстаўлення сакрэтнай інфармацыі», якая паставіла пад пагрозу «сакрэтную інфармацыю і крыніцы выведных звестак, а таксама нанесла шкоду намаганням у дасягненні мэтаў вайны ў сектары Газа», паводле інфармацыі, якую суд апублікаваў 1 лістапада

Прэм'ер-міністр Біньямін Нетаньяху адмаўляе, што нехта з супрацоўнікаў ягонага офіса быў замяшаны ў інцыдэнце.

Нетаньяху дадаў, што ніякай выцечкі сакрэтнай інфармацыі з ягонай канцылярыі не было і абвінаваціў у ёй іншыя дзяржаўныя органы Ізраіля, якія, аднак, ён не стаў называць.

Ізраільскія афіцыйныя асобы сцвярджаюць, што адзін з затрыманых падазраваных з'яўляецца найбліжэйшым памочнікам Нетаньяху.

Паводле звестак ізраільскай грамадскай тэлекампанія Kan, гэты памагаты цесна супрацоўнічаў з Нетаньяху з моманту пачатку баявых дзеянняў ЦАХАЛ супраць Хезбалы, удзельнічаў у важных нарадах пытанняў бяспекі і атрымаў доступ да строга сакрэтнай інфармацыі, хоць і не праходзіў праз праверку біяграфічных звестак.

У выніку памочнік не атрымаў допуску да звестак, неабходных для працы ў офісе прэм'ер-міністра, і ён не быў афіцыйна прыняты туды на працу. Пры гэтым ён актыўна кансультаваў Нетаньяху, падсумавалі журналісты.