Гарыс супраць Трампа: ацэнка сітуацыі на апошніх выходных напярэдадні прэзідэнцкіх выбараў у ЗША
- 2.11.2024, 16:54
Гонка набліжаецца да фінішнай прамой.
На вечар пятніцы, 1 лістапада, ніводны з кандыдатаў у прэзідэнты ЗША не меў адрыву больш чым на 2% у аніводным з сямі ключавых вагальных штатаў, паводле сярэдніх звестак апытанняў, якія сабралі The Hill і Decision Desk HQ (DDHQ).
У трох з гэтых штатаў - Мічыгане, Пенсільваніі і Вісконсіне разрыў паміж кандыдатамі, Камалай Гарыс ад дэмакратаў і Дональдам Трампам ад рэспубліканцаў, склаў менш за 1%.
Палітычныя аналітыкі адсочваюць лічбы датэрміновага галасавання ў пошуках падказак. Аднак прагназаваць фінальны вынік усякіх выбараў на аснове паказчыкаў датэрміновага галасавання - ненадзейна.
Тым часам каманды кандыдатаў спрабуюць умацаваць давер сваіх прыхільнікаў.
Што зараз вядома аб ходзе гонкі
У Трампа ёсць невялікая перавага
Апытанні паказваюць, што Гарыс і Трамп ідуць практычна нараўне. Але калі нехта з кандыдатаў і мае хоць нейкі намёк на перавагу, то гэта Трамп.
Былы прэзідэнт апярэджвае Гарыс у большай колькасці вагальных штатаў, паводле сярэдніх паказчыкаў апытанняў, сабраных DDHQ.
Паводле часткі апытанняў, Трамп лідаруе ў шасці вагальных штатах. Некаторыя іншыя мадэлі паказваюць яго перавагу ў пяці такіх штатах. «Рознагалоссі» ўзнікаюць у Вісконсіне.
Між тым, на агульнанацыянальным узроўні апытанні даюць нязначную перавагу Гарыс.
Агулам паводле звестак DDHQ, яе перавага складае толькі тры дзясятых адсоткавага пункта. У 2016 годзе кандыдат ад дэмакратаў Хілары Клінтан перамагла ў агульнанацыянальным галасаванні з перавагай, большай як 2%, аднак саступіла на выбарах.
Зрэшты, перавага Трампа не канчатковая. Прагнозы DDHQ і FiveThirtyEight даюць рэспубліканцу 54% і 51% шанцаў на перамогу адпаведна, што мала адрозніваецца ад падкідвання манеты.
Існуе выразны раскол паміж штатамі Сонечнага пояса (Джорджыя, Арызона і Невада) і Блакітнай сцяной (Мічыган, Пенсільванія, Вісконсін). Увогуле, Трамп мае лепшыя паказчыкі ў штатах Сонечнага пояса, тады як Гарыс - у штатах Блакітнай сцяны.
Найбольшую перавагу сярод усіх штатаў Трамп мае ў Арызоне, дзе ён прыблізна лідаруе на 2%. Нязначна адрозніваецца сітуацыя ў Джорджыі, дзе ён мае перавагу 1,9% і Паўночнай Караліне (1,4%).
Мадэлі прагназавання DDHQ даюць Трампу 65% шанцаў на перамогу ў Джорджыі і не больш за 53% шанцаў на перамогу ў кожным з трох штатаў Блакітнай сцяны.
Тут важна падкрэсліць «матэматыку» Калегіі выбарцаў.
Калі Гарыс пераможа ў трох штатах Блакітнай сцяны, яна зойме Белы дом, нават калі Трамп пераможа ў іншых чатырох штатах - пры ўмове, што ўсе астатнія паказчыкі будуць адпавядаць тым, якія былі на выбарах 2020 года.
Пры такім сцэнары Гарыс пераможа з мінімальна магчымай перавагай: 270 галасоў Калегіі выбарцаў супраць 268 галасоў у Трампа.
Два «кастрычніцкія сюрпрызы»
За апошнія шэсць дзён былі два «сюрпрызы»: жарт коміка Тоні Хінчкліфа на вялікім мітынгу Трампа ў мінулую нядзелю і каментар прэзідэнта ЗША дэмакрата Джо Байдэна, які назваў прыхільнікаў Трампа «смеццем» у аўторак, 29 кастрычніка.
Агаворка Хінчкліфа была электаральна важная, бо накіроўвалася супраць Пуэрта-Рыка. У некалькіх вагальных штатах пражывае значная колькасць пуэртарыканцаў, прынамсі, больш за 400 тысяч толькі ў Пенсільваніі.
Кампанія Гарыс спрабавала максімальна выкарыстоўваць гэтую сітуацыю, нават выпусціла новую рэкламу.
Тым часам Трамп паспрабаваў мабілізаваць сваіх прыхільнікаў, засяродзіўшыся на каментары Байдэна аб «смецці».
Патэнцыйныя памылкі апытанняў
Адно ключавое пытанне пераследуе кожнага аўтарытэтнага сацыёлага: ці могуць іх мадэлі наконт прыходу выбарцаў выявіцца памылковымі.
Гэтая частка апытанняў па сваёй сутнасці мяркуе абгрунтаваную здагадку і адначасова стварае магчымасць памылкі.
Адзін з імаверных сцэнарыяў сёлета палягае ў росце прыходу выбарцаў, натхнёных жаданнем абараніць рэпрадуктыўныя правы. Гэтая група выбарцаў падтрымлівае Гарыс.
Калі б такі ўсплёск матэрыялізаваўся і Гарыс перасягнула свае паказчыкі ў апытаннях усяго на 2% - яна перамагла б у кожным вагальным штаце.
Але такія сцэнары зусім не з'яўляюцца «аднабаковымі». Трамп, напрыклад, раней ужо перасягаў паказчыкі, якія яму давалі апытанні, часам з вялікім адрывам. У Вісконсіне ў 2020 годзе яго канчатковы вынік быў на 5% вышэйшы за сярэднія паказчыкі апытанняў. Байдэн тады ўсё ж атрымаў перамогу ў штаце. Але Гарыс сёлета не мае права на памылку.
Нават найменшая перавага Трампа ў вагальных штатах дазволіць яму параўнальна лёгка вярнуцца ў Белы дом.
На падлікі NBC News, на суботу, 2 лістапада, больш за 66 мільёнаў выбарцаў у ЗША ўжо датэрмінова прагаласавалі праз пошту ці асабіста. З гэтых выбарцаў 41% - дэмакраты, а 40% - зарэгістраваныя рэспубліканцы. 19% выбарцаў, якія прагаласавалі датэрмінова, не звязаныя з ніводнай з асноўных партый.